ADVERTISEMENT

This area is available for advertisement. Please contact for details.

Arnivang
Get Adobe Flash player

Charchim-Presek ahoni: Pre 17 arni ki-ik hoksi chikimoji

Diphu, Pre 11: Non kevangji Pre 17 arni Charchim Presek along kedamtang Karbi-Dimasa kacharvo ahut adai kave atum ephongvet bus ihum amonit apran kedam nang arni aphan arni ki-ik hotsi ningduk pen chikimoji.
Hills Tribal League (HTL) pen patirpisi kevangji Pre 17 arni adap porphai 10 apor pen Charchim Presek chikimo along-eh along chikimo dampo.
Pinpurme, kedamtang 2005 aningkan Karbi pen Dimasa kacharvo ahut ongdung adai kave a Karbi atum apran dam nang lo.
Laso kacharvo ahut Karbi akhei phurkimo along isi katengne un-eh pin arni asonsi Pre 17 arni ke mandet lo. 2005 Pre achiklo niphai 17 arni bus ihum along kachethap Karbi do-an atum aphan Dimasa klempar asong atum pran armut lo. Laso ahut adai kave atum apran karmut chot kali mahang kethekmi pirthe akeme-heno kachini dunde pinlang a oso aphan anta pajokjesi apran armut lo. La-an chot kali amethang ahem-arit kachevang lapen kaprek-kaprek asai aphan kedam aso-arlo atum aphan cheneksi apran armut lo.
Bus ihum along kachethap kedo-an a Karbi atum aphan Charchim Presek pu adim alongsi apran armut lo. Laso along ongdung apran kedam atum akarjong ningkangsam pen chom rongme kedo dun thekji aphan pusi aningkanvang ta Karbi akhei atum melur kai dam lapen ongdung atum Charchim Presek along dam pen chingduk dam lo. Laso ateng pini seta ajahak hamphang asong lapen haladak ahavar along kedo a Karbi atum pen chenglok havar arlo kaprek-kaprek along kedo Karbi atum chingduk damji pusi birta rip dun long.
Pining 2018 aningkan Pre 17 arni laso kachikimo pen kevangji arni lapuson aron thama kave detji lapen adai kave atum apran kedam jokplotji aphan monsam birta kapachethangji aphansi Hills Tribal League atum pen mang lo. Lasi kevangji Pre 17 arni Charchim Presek kachikimo along Karbi Anglong arat do-an atumta kacheto dunji lapen amethang-methang ahavar along kachikimo dun pen kevangji arni lapuson arni ki-ik kevang thuthe detji aphan monsam abirta kapachethangji aphan HTL choningri.

Leave a Reply

Your email address will not be published. Required fields are marked *

October 2018
M T W T F S S
« Sep    
1234567
891011121314
15161718192021
22232425262728
293031  
Archives