ADVERTISEMENT

This area is available for advertisement. Please contact for details.

Arnivang
Get Adobe Flash player

Tovar kaheno aphuthak Hamren PWD Rds division asaiphu arideng WKADCC atum pinpur aloh kapajir

imageHAMREN, Pre 10: North Eastern Council (NEC) atovar amo kevangve atengsi KAAC kaparlo PWD atovar anta Hamren rongsopi angkang kacheleng atovar akrongtinta kaheno et aphuthak West Karbi Anglong District Congress Committee pen Chinthong Block Congress Committee atum chelangpet Hamren PWD Roads division asaihem athengno kachesong asai dengsi kehang alamthe jong dunsi pinpur aloh pajir tekang.
Pinpur aloh along kejong dun ke, town committee kaparlo ward No. 6 NEC atovar pen Langkar-om adak kacheleng PWD atovar Matijong 31 aprang patang etsi rat aphan mesen atovar pacheleng long nangji. Laso adak atovar kaselam kangton pen ajok Donbosco School kacharli pupu asomar atum kedam-kevang akisung katekuk dokok lo.
Halapu Ward No. 7 arlo NEC atovar pen Soil Conservation (Harlongjuve) km 4 ajak selamprui (Repairing) asai chiklo jon 10 apor dam det aphi pini arni anta kapatangte rek atovar prapjin pen patang nangji puta jong dun.
NEC atovar ingchin adolong pen Rongchek Km 27 adak PWD atovar anparta Um-Ut aroi along kedon adolong kaheno ajok arnivang ahavar arat Hamren an nang kapale akisung aphuthak ta pinpur aloh along jong dun. Prapjin pen lahai atovar kaselam patangte pulote WKADCC pen CBCC ingtangkring kachesong asai dengji puta chingkrin.
NEC atovar krong pli kachetok pen civil hospital an Km kethom brick soling atovar kapatang terek ta Matijong 31 aprang patang pame nangji. Lahai atovar kapatangte rek ajok rongsopi arat arnivang kacheleng kisung thektiksi chechak nang bom lo. Kachonam-choret, seh kachelang ahem along keso ki-un eh kachepon anparta SBI along kedam kevangji aphanta anta kisung thetan lo.
Ward No. 5 arlo Ambinong LP School pen Porbot adak atovar ajak dingklui apor pen kaselamle aphuthak prapjin pen salok nangji pu heihui alam jongdun pen West Karbi Anglong District Congress Committee atum pen pinpur aloh pajir lo.
WKADCC ameiphu Sarthe Kramsa, dun meiphu Welson Teron, CBCC ameiphu Andhoni Teron, Socheng Mondal Congress ameiphu Longwel Phangcho, chunbang Gladstone Tisso lapen kaprek-kaprek song klembang atum chetong dunsi kachesong lapen pinpur aloh kapajir asai mesen pen pachun lo.

Leave a Reply

Your email address will not be published. Required fields are marked *

BREAKING NEWS
October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives