ADVERTISEMENT

This area is available for advertisement. Please contact for details.

Arnivang
Get Adobe Flash player

RSS, VHP lapen Bajrang Dal kapinkhat pen BJP kachari ratpangri kithitang alamki kapareng thuji aphansi kabor-i: ASDC

Diphu, Pre 10: Lakhi Mandir Puja Committee atum kedamtang arni phangkodong kitin pen rat thurpak kethengbop aphuthak pandal along kapaklang thuji puke rat aphan aning kapapung thu asai keklem asonsi theklong, seta laso along home department kacherai Assam chief minister Sarbananda Sonowal ke amek selok dunhetsi thek long. Lasi RSS, VHP lapen Bajrang Dal atum kapinkhat pen keklem BJP kachari state ratpangri atum kithitang alamki kapareng thuji aphansi kabor-i asonsi thek long. Lapuson kacharvosai alam kapaklang asai keklem kapave detji lapen longri arlo monsam kapadoverji aphan state ratpangri atum alongsi kethedung arpu do lo pusi ASDC atum jong.
BJP atum drama keklem asonsi Karbi Anglong a CPI-ML atumta cheparjansi hemprek apharman pinpur aloh kapajir asai klem lo. Ahokpet alam ke kedamtang 2013 aningkan Paipai achiklo niphai 8 arni CPI-ML atum hemprek aphan khamkhesi Assam a governor arideng pinpur aloh pajir dam pu alam kedamtang 2013 Paipai 9 arni Sentinel abirta aloh along klang lo. Lasi non apor alanglitum hemprek kehang alam kaningje aron anta ave lo puta ASDC atum jong.
La-an chot kali kedamtang 2017 aningkan Matijong 9 arni Diphu indoor stadium krungsai amai kangni ahut kapavir tang asong HSDC amen along chetebinsi CPI-ML atum rat along cheklang lo. HSDC pen kachekrong Laichan Ingleng, Semion Rongphar, Mongve Rongpi lapen Amlong Ingti atum ahokpet a CPI-ML lo lapen lahai atum ke nonputa Bihar along CPI-ML a jabang aphan CPI-ML card anam (levy) achiklo jonvang ta chipi bom lo.
Karbi Anglong arlo CPI-ML ajabang kethenai Dr. Jayanta Rongpi ke kedamtang 1999 aningkan MP kilik kachedan dun ahut CPI-ML apharman Bulting (Bucket) arjan pen kilik kachedan dun ahut pensi hemprek apharman kachesong along pen ke alangli che-oh bup lo. Laso aphi Dr. Jayanta Rongpi puthot state apharman kachesong along chevang thuthe det lo.
West Bengal state Panchayat kilik along keklem ason thakthak ladak ta CPI-ML atum komatne Congress lapen BJP atum pen chelanglok puseta kamanghumemeji alam ASDC atum thek longle pusi Autonomous State Demand Committee atum jong pusi ASDC pachethang aro klembang Kamalsing Bey birta pachetak.

Leave a Reply

Your email address will not be published. Required fields are marked *

BREAKING NEWS
October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives