ADVERTISEMENT

This area is available for advertisement. Please contact for details.

Arnivang
Get Adobe Flash player

Junu Sharma aphan apran karmut aphuthak SBIOA North Eastern Circle atum kapinrem

Guwahati, Pre 10: SBI Dadara Branch Service Manager Junu Sharma aphan apran karmut det aphuthak State Bank of India Officers Association (North Eastern Circle) atum sodak pinrem.
Pre 9 arnikangsam banghini pangthekthe atum motor cycle pen vangsi Agiathori along atumi Junu Sarma aphan ke-ap tekang bop ke manghu meme binong.
Birta kelong dun atengke, banghini amonit atum motor cycle pen vangsi Junu Sharma kachethap a car a inghap a glass panghangsi adung pen ap tekang lo. Laso aphi Sharma phan North Guwahati Narayana Hospital along tongsekot pon lo, seta hadak kele ke thi-et lo pusi Doctor atum pen pangdak lo.
Ningduk meme alam ke, bank a chokomar atum rat akehang ateng lapen ratpangri atum kejong ateng kapaplengji aphan keklem kachepaduk bom ahut inut bank asaiphu aphan pathilot.
Bank asaiphu saikhi atum arnisi angbong ghonta 12 sose sai keklem chepaduk lo, seta lapuson apran karmut pen ajok bank asaikhi atum sai keklem kachepaduk along aning kapabi dun asonsi man lo.
Junu Sarma aphan lapuson apran karmut ke kamatha thekthe lapen laso asai langno keklem atum ke katherak meme anparta kamaranai asaisi keklem pusi SBIOA atum jong dun.
La-an chot kali, lapuson asai langno kedo longpop ke Administration atum penta isi ki-un mate aron kachari thekthe anparta rai aphan raikom thekthe angthek lo puta Association atum jong.
Laso apran karmut aphuthak sodak pen tarlip nangji lapen adai kedo atum aphan prapjin pen nep ingnang nangji pusi SBIOA, North Eastern Circle atum kehang paso. Athe non jongsi nep ingnangne lapen sodak adai en-eh pulote lason thakthak kaheno dak asai kevangji arni anta do thu bomji puta jong.
Bank chokomar , saiphu a union atum pen laso aphuthak CBI patarlip nangji, athe inut abangphi aphan rat athengno amatsi apran armut tekang lo. Jongsi kehang ateng ratpangri atum paplengple pulote la-an sose song pen kachesong asai deng nangkok po. Laso ahut rat aphan jongsi kopine katora dokok pulote ratpangsi atum adai che-en nangji.
Laso aphuthak ningduk kachipi asai Guwahati angkang rat athengno ningduk kachipi asai dengji. Lapen bank asaiphu saikhi do-an atum aki-ik apeh achet chepabonsi ningduk chepaklangji pusi State Bank of India Officer Association a sankur chunbang Rupam Roy birta pachetak.

Leave a Reply

Your email address will not be published. Required fields are marked *

BREAKING NEWS
October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives