ADVERTISEMENT

This area is available for advertisement. Please contact for details.

Arnivang
Get Adobe Flash player

Jagat Sing Ingti Gunotsav-2 katalon Adarsh LP School along kelang chari dam

imageDiphu, Pre 9: Assam angkang long 16 a district ingvaisi pini Gunotsav-2 Phase 1 ajaimek kedamtang Pre niphai 8 arni pen chengsi kevangji Pre niphai 11 arni an pajut po. Long 16 a district angbong pen Karbi Anglong district ta Gunotsav-2 pado dun bomlo. Karbi Anglong angkang LP pen ME school pangrum pet pen hum 1,356 a school along Gunotsav-2 do bomsi pini KAAC Higher Education a EM Jagat Sing Ingti Diphu Power House along kedo Adarsh Hindi L.P School along lang chari dam.
Gunotsav-2 ajaimek ateng pensi kedamtang Pre niphai 8 arni School Managing Committee (SMC) atum pen LP School ingdeng II pen V angdeng kacharli lapen ME school ingdeng VI pen ingdeng  IV angdeng kacharli a osomar atum aphan karju lapen ketok asatlang en. Laso atengsi pini Adarsh Hindi L.P School along L.P angdeng ingdeng II pen ingdeng V angdeng kacharli a osomar atum aphan External Evaluator aman pen KAAC EM i/c Higher Education Jagat Sing Ingti lapen Protocol Officer aman pen Dokmoka H.S School along Assamese subject thanbang Komola Ingtipi atum chetong dunsi kaprek-kaprek a school along ason English, Math, Hindi lapen Environment a subject heihui aphuthak SSA atum kapathik karju aloh ateng pen loh charli osomar atum aphan karju lapen ketok asatlang enlo. Pini bangso asai along Inspector of Schools Rowelson Rongpi – AES, Block Primary Education Officer mate Lumbajong Education Block BMC Sunsing Tokbi, Adarsh Hindi LP School thanbang kehoipi Basanti Killingpi atum chetong dunsi lang chari dun lo.
Longri arlo kedo an a school ta Gunotsav kapadoji aphan chesik chot ke chokche, loh charli osomar atum aphan kapathekji aphan kaike ta Gunotsav kapado atengsi pado ver nangji. Gunotsav kapado pen kacharli anat mesen atomon vanlo. Jongsi Gunotsav ave pu asonte ajahak thanbang atum achiklo-chiklo school ahem kachedamde alam theklongle lo. Lasi osomar kapathekji aphan ratpangri (sorkar) aphan chikiding chot ke chokche, thanbang pen chenglok api-apo atum anta osomar atum aphan kapathek-kapare lapen kapangthir-et kapado thekji aphan cherap-cheto dun nangji. Setame lapuson kacherap-cheto rong atok-ano school along ke thek dam longle pusi KAAC EM Jagat Sing Ingti pherangke angno jai.
Adarsh Hindi L.P School along pini Gunotsav-2 ajaimek kedeng along kethek dam atengke bangso school ke kenangsot ason-amung ke do-et lo, setame longle abangsi kadure do anpata thanbang atum ta thekser atumsi do. Bangso school along L.P angdeng 132 loh charli osomar angbong pen bang 4 atum ke pini school along nang pale dun un-eh det, lasi lake monit apot a ok apran kememe ta dokokji. Pini bangso school along loh charli osomar atum ke-ongdung aphai atum ke ketok lapen kelang anta thek-et setame toklang atemon kapado verji aphan ansose kapame abang kenangsot dolang puta EM Jagat Sing Ingti jai.

Leave a Reply

Your email address will not be published. Required fields are marked *

October 2018
M T W T F S S
« Sep    
1234567
891011121314
15161718192021
22232425262728
293031  
Archives