ADVERTISEMENT

This area is available for advertisement. Please contact for details.

Arnivang
Get Adobe Flash player

Nilip Hirjir Amei mesen pen kichun

Diphu, Pre 8: Methang Karbi alam kapachanji lapen kangthurji pu akemang kedamtang Pre 6 arni Diphu Jambili Literary Foundation lapen Karbi Lammet Amei Chokihola aro atum chelangpet patirpisi Chokihola HS school along Nilip Hirbang Amei amai pangni. Jaimek ateng adap porphai 9 apor pen amen kachethap pangcheng lo. Lasi aphi porphai 10 apor malom Hirbang Amei pangcheng lo.
KLDB chairman Hukursing Rongpi arideng Hirbang amei ingpu lo, laso ahut Chokihola HS School Principal Dr. Ranjit Ronghang, KCS a chunbang barim Saising Rongpi, lapen KAT Deputy CEO Dhonison Lekthe atum pha pangjang alohi aman pen chetong dun.
Mai along Nilip Havar Chingthur amei ameiphu pen chenglok kaprek kaprek man kedo atumta chetong dun.
Nilip Hirbang Amei ameiphu Bilson Terang pensi pen mai kepha alamthe jai, laso aphi KLA dun meiphu Chitra Kumar Bey kachepahemphu amai along along kado kave bang 80 sose atum hirjir kihir chepate dun.
Hirjir kachepate along KLA bidisar atum, Sing Kro, Barim Ingti, KLDB ameiphu Hukursing Rongpi, Kamsing Kro, JLF dihin rimbang Longbir Terang, JLF dihin rimbang Biren Hanse pensi langchari dun lo.
Hirjir kihir kachepate jutdet aphi KLA Chokihola aro dun meiphu Khoyasing Ingti mai chepahemphusi lammet aphuthak chethan chimun amai pangni lo, mai along anong kachethang klong tokbang Joysing Tokbi, anong kachethang klong hirbang Khorsing Ingti atum pen hirjir kihir aron atang pen chenglok methang Karbi akhei alam kapangcho anangji aphuthak klardak alamthe jai tekang.
Ongdung hirjir kihir kachepate atum angbong pen Hamren asor Longsing Tokbi aphan kechengsi anong-eh, Nilip asor Arpoly Teronpi aphan adunthu nong-eh lapen Stephan Karmokar aphan kethom angdeng nong-eh pajir.
Hirbang amai along pacheton dunsi Facebook along kedo Karbi Hirjir Achatai along kapaklang do’an ahirjir Paipai achiklo kemenai ahirjir apharman Volongkom Aji asor Dayaram Tokbi lapen Chiti achiklo kemenai ahirjir anong-eh Phelangpi asor Rupsing Ingti Kathar aphansi pajir lo.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives