ADVERTISEMENT

This area is available for advertisement. Please contact for details.

Arnivang
Get Adobe Flash player

Long 9 constituency apharman Hamren along Ayushman Bharat a card keron amai kangni

imageDiphu, Pre 7: Hamren constituency angkang Langsudo LP School pathu aklam along long sirkep constituency angkang apharman Ayushman Bharat Yojana card keron amai ingni. BPL card kedo atum mate kadure det arat atum aphan panongsi kedamtang 2011 socio-economic census kelong ateng Karbi Anglong angkang pangrumpet 88,430 Ayushman Bharat Yojana a card ronpo. Lasonsi pini West Karbi Anglong alongri angkang long sirkep adang aphan ta keron amai ingni. Bangso a card pen sika lakh pho atangka inut amen pensi longji lapen laso a card isi pensi hem isi majok le keso chelangji pusetame varsai longpo. Kelong atum mate socio-economic census along amen keklang dunde atum anta long etji. Pinpurme, duk det arat atum kopai keme kedamtang arni ta Atal Amrit Abhijan pen sika lakh ni atangka ta ron pajir lo. Lasi pangrumpet sika 7 lakh atangka ningkan pho angbong seh chelang longpo. Seh kachelangji ahut ning kehang ateng jong jung, ratpangri pen kacheparideng seh lang alongta kachelang dam avarsai long. BJP aratpangri pen lahai saideng dengsi pini penang an rat arideng chetang lo. Sonsi dukdet arat atum aphan akejoi pen LPG, PMAY ahem, old age pension, widow pension, revenue village aphan power tiller, tractor, SHG atum aphan school uniform, kitap lapen amen kachethap anam pen chenglok kaprek-kaprek scheme deng bom lo. Anparta Karbi Anglong pen Dima Hasao arat akemang Art. 244(A) kapachun daprangji aphan sorkar pen chingki bom lo. Kedamtang Assembly amai along Karbi Anglong pen Dima Hasao akisung aphuthak special amai ingni nangji pusi CM Sarbananda Sonowal aphan kachingvai atengsi kedamtang Pre 5 arni Assembly along hanglo lapen hemprek aphuthak pachini dun lo. Lasi rat atum kacherap-kacheto kenangsot pusi KAAC CEM Tuliram Ronghang jai.
Bangso amai along ratpangri school along kacharli a-osomar atum aphan solar lamp alohi sarpo arideng pen ron. Laso a scheme Karbi Anglong angkang kedo ratpangri school along kacharli a-osomar atum anke laso a solar lamp long etji lapen pini pen ke kapangcheng lo puta CEM jai. Kedo lang a card kevangji Pre 10 arni a constituency tin ta ron patang et nangji lapen 15 arni pen lote laso a card activat po puta mai along jai rinti.
Ditolal Hasnu kachepahemphu amai along alohi sarpo aman pen KAAC CEM Tuliram Ronghang chetong dun. Pha pangjang aman pen MLA Dr. Mansing Rongpi, KAAC chairman Longki Timung, EM Amorsing Tisso, Rupsing Teron, Khonsing Rongpi lapen Prodip Rongpi, MAC Horensing Bey, Mongol Sing Timung,  Prabhat Chandra Taro, Rina Terangpi, Pawan Kumar Rai, D. Uphing Maslai, Ramsing Timung, Dorsing Ronghang lapen Richard Tokbi, joint director HS Dr. Kareng Rongpipi lapen MO Dr. Borsing Rongpi atum chetong dun.
West Karbi Anglong district angkangpi along PM-JAY a card pangrumpet 26,805 longji, PM-JAY a card pangrumpet 61,675 long dunji, Karbi Anglong Diphu pangrumpet pen 88,480 PM-JAY a card Karbi Anglong Autonomous Council pen ronji puta CEM Ronghang jai.
Karbi Anglong alongri block kethom Rongkhang Development Block along 27,034 aphai do, Lumbajong Development Block kaparlo 16359 aphai, Langsomepi Development Block kaparlo 11111 aphai ratpangri school charli a-osomar atum aphan solar lamp ron pusi Block Project Manager asaiphu Jonathan Ronghang pangdak.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives