ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi cheraikomke si Sum Ronghang pen Tuliram Ronghang angbong jakong kachithi ansi dokhang jang lo: Jotson Bey

Denarong along ephongvet don 241 ASDC along kachingbe dun

imageBAKALIA, Pre 7: Kevangji MP kilik apharman kaprek-kaprek aratchari asong atum song ajakong kapangtangji aphan ason-ason sai kedeng apor ahut pini Denarong along kaprek-kaprek aratchari asong pen don 241 ahemtun atum regional aratchari asong ASDC along chepa-ok dunlo. Dearong Sports Association pathu aklam along ASDC Bakalia District Committee ameiphu Keshop Terang kachepahemphu amai along Namati, Karkanthi, Mahamya lapen Socheng Dhenta constituency pensi halahai arat atum ASDC along chingbe dunlo. Laso angbong Congress asong pen don 80, BJP pen don 61, AGP pen don 11, songve pen don 29 lapen Dokmoka branch pen kaprek-kaprek aratchari pen don 60 atum chingbe dunlo pusi ASDC asong pen pangdak. Mai along ASDC sankur chunbang lapen KAAC CEM barim Jotson Bey opposition asong atum aphan un-an arboksi alangli kaningje ke, nonhetjong Dokmoka police station angkang Kangthilangso along phangkedong kitin pen ban hini arisomar atum apran kedamnang alamki along hadak adai kave sankur arat atum kisung kachetong nang dolo setame laso aphi anta madu MLA lapen KAAC pen inut ta chetong dunde detlo pusi akoi pi. Meghalaya asor atum Assam alongle along nujok nangkesom pen danglok Assam tarpangphek heihui phalangnosi Meghalaya atarpangthek somkok aphita Congress a MP Birensing Ingti lapen Assam a HAD minister Sum Ronghang atum laso aphuthak ase angtong kachipi dunji aphan haihe detlo. Halapu ahoi along kedo arat atum aphan keraikom kipi nangji alar minister Sum Ronghang pen CEM Tuliram Ronghang angbong jakong (power) kachithi ansi dokhang janglo lapen Council along atangka kachopanglimji aphansi kabor-i pusi CEM barim Jotson Bey akoi pi. CEM barim Jotson Bey kejai thuke, nonhetjong pu-pu a state DC angbong kachingvai ahut Karbi Anglong MLA atum aphan pado dunlongle detsi angtan alongsi pangnilun lo puta ningjesi non apor ahut Dr. Jayanta Rongpi, Elwin Teron, John Ingti Kathar, MP Birensing Ingti, minintsr barim Khorsing Ingti atum ason ajabang atum aphan pini inglong alongri arat atum ning kachethe athai ave. Doctor ateng pen ningkan pharo anta khi-adat kachepangcho un-eh Dr. Jayanta Rongpi alangli ratchari along lutsi khi-adat chepangcho lo pu Jotson Bey arboksi Dr. Jayanta Rongpi kedamtang CEM kekhi ahut ratpangri asaiphu atum pen chelangsi un-en chopanglimlo pusi akoi pi. Halapu 24+Organisation jabang IAS Rtd. JI Kathar aphanta Jotson Bey un-an arboksi JACAS atum kachesong kehang kichunji asai along Kathar asangho ke pavir dundetlo pusi ningje. ASDC kachesong ke district pen Karbi akhei kali atum aphan karplung pen kali puta Jotson Bey ningjesi autonomous state sengdet aphi kado-kave akhei atumta jakong longrap petpo, lasi laso kachesong along cherap-cheto rappet nangpo pusi choningri. ASDC ameiphu Holiram Terang pherangke atum pen chepathengno karju ahut alangli 24+Organisation aphan panosi district arlo sankur arat angbong kethak aratchari keklemkle detji aphan choningri. Regional asong AGP atum BJP atum pen pajirpo tik ke ASDC asong pen MP kilik ahut pajirpo un-eh puta alangli ningjesi AGP atum BJP pen kapajirpo chekak lote MP kilik ahut AGP pen pajirpoji pajirpope ke mo aphisi mathapo pusi ningje. Mai along MLA barim Dharamsing Teron, dun meiphu Chomang Kro, EM barim Sonasing Terang, KAAC Chairman barim Daniel Teron pen danglok KSA pen KNCA jabang atum chetong dun.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives