ADVERTISEMENT

This area is available for advertisement. Please contact for details.

Arnivang
Get Adobe Flash player

Socio-Economic kapachingthurji aphuthak Assembly along ardi dojot pen kachingvai

Assam Assembly, 2018

imageDIPHU, Pre 5: Karbi Anglong, West Karbi Anglong lapen Dima Hasao, la kethom inglong a district along choki-chokam amo mate socio-economic kapachingthurji aphan lapen Article 244 (A) autonomous state aphuthak pini Assam Assembly Session along ardi dojot pen chingvai. Speaker Hitendra Nah Goswami kachepahemphu Speaker Initiative pen kachingvai along inglong kethom a district pen bang pho a MLA atum chetong dun. Laso ahut Article 244 (A) hemprek aphuthak pen danglok, school, college, ok-pran kelang ahin, kacheleng ahin anparta Agriculture, jutang-jubat pen danglok ason-ason aphuthak chingvai lo. Laso ahut MLA Dr. Mansing Rongpi kaningje dunke, Assam along hini inglong a district arlo kedo arat aphan kapachingthurji aphan ansose ardi pinangji pu ningjesi Karbi Anglong pen Dima Hasao inglong aso atum choki-chokam ahin penang an akisung dolo. Diphu pen Haflong along kacharli avarsai kedo asonsi along kaprek adimta laso avarsai do nangji. Halapu inglong alongri arlo kedo higher secondary angdeng kedo school malom science a stream ave puta ningje dun. Kapachingthurji aphan Council along ansose ajakong pithu nangji lapen tangka ta kipi pa-ong nangji pusi choningri dun. Speaker Hitendra Nath Goswami kapatirpi kachingvai amai along MLA Ranoj Pegu kaningje dunke hini inglong alongri arlo kedo arat atum kapachingthurji aphan ave kirui kachingvai do nangji lapen kacharli ahin ansose kangthur ponji aphan tangka kenangsot pu ningjesi kelang abolon kedo Karbi Anglong pen Dima Hasao kapachingthurji aphan tourisim ahin pen ardi pilote ale doji anparta Nagaland Hornbill Festival pirthe adang kachethang asonsi Karbi Youth Festival aphanta kapachethang dunthekji aphan ratpangri pen patirpi nangji pusi alangli choningri. KYF state level an ponthek pulote pirthe adangpi along Karbi Anglong pen Dima Hasao araje klangdun dongpo. Lason thak thaksi Dima Hasao MLA Bir Bhdra Hagjer ta Dima Hasao along kacharli ahin akisung aphuthak ningje dunsi inglong alongri arlo kacharli avarsai ahin non anta kadure dolang Karbi Anglong, Dima Hasao lapen West Karbi Anglong along akangtui angdeng kacharli avarsai kave det ajok, Guwahati, Nagaon, Jorhat, Dibrugarh alongsi charli dam nanglo pusi ningje.
Bokajan a MLA Dr. Numol Momin Assam University Diphu Campus abang laso aningkan angbong kechoklimji aphan pangdak nangji pusi parno dunlo. Karbi Language Teacher ta pilap nangpo lapen Karbi kali atum aphanta Karbi alam thansi chingki-chethan pen chepatebok nangpo. Halapu Article 244 (A) ta pi nangpo, regional council ta pinangpo lapen village council ta padosi kedo-an akhei atumta ning isivet pen do-thak nangpo pusi MLA Monin parno dun. Alangli kaningje dunthuke, sixth schedule aron pen Karbi Anglong pachingthur nangpo puta ningje dunsi Karbi Anglong along ST(H) 3000 sose backlog post do lasi prapjin pen halahai anghoi papleng nangpo puta MLA Momin parno dunsi hills medical college prapjin pen ingpu nangpo anparta non keklembom doctor atum an aphan ningkan isi-si apharman medical college along medicine, surgery, dynamic, NRCC aphuthak seke pinangpo la-ansi atok ano adim alongta se kachelang ahin mesenpo pusi ningje dun. College along geography pen anthropology a subject pi nangpo lapen Karbi alam pen MIL tok long nangpo puta ningjedun.
Pini socio-economic development pen Artcle 244 (A) aphuthak kachingvai ahut inglong kethom a district pen MLA bang pho ke minister Sum Ronghang, Dr. Mansing Rongpi, Dr. Numol Momin, Joyram Ingleng pen danglok BJP, AGP, AIUDF Congress pen bang 17 atum chetong dun.
Pinpurme pini socio-economic development aphuthak kachingvaiji apharman Speaker Hitendra Nath Goswami kedamtang Chiti achiklo niphai 26 arni kepha atengsi kethom inglong a district pen ratchari jabang atum anparta penang an kethek-kere atum chetong dunlo. Halabangso arni CEM Tuliram Ronghang ta socio-economic kapachingthurji aphuthak ason-ason alam ningje dunsi, Article 244 (A) autonomous state, law & order, direct funding, sixth schedule ajakong heihui aphuthak parno dunlo. Lasonsi inglong alongri pen kachetong dun ongdung kethek-kere atumta Karbi Anglong kapachingthurji apharman penang an bidi-sore pachoi dun.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives