ADVERTISEMENT

This area is available for advertisement. Please contact for details.

Arnivang
Get Adobe Flash player

Hemprek aphuthak KAAC pen angtang kapaso dam Prime Minister Modi aphan kapanong apinpur Rijiju arideng kapajir

IMG-20181005-WA0050DIPHU, Pre 4: Tiri ratpangri along BJP jakong cheharjak longlo pulote article 244 (A) nang pachun pipo pu alam BJP aphan akoi van pik lo. Lasi article 244 (A) aphuthak ministrial level kachingvaiji aphan KAAC pen DHAC abitung aphan pha lo. Pini New Delhi, North Block along Minister of State for Home Affairs Kiren Rijiju aphan KAAC pen DHAC abitung atum chetong dam. Karbi Anglong Autonomous Council pen CEM Tuliram Ronghang, chairman Longki Timung, EM atum Prodeep Rongpi, Rupsing Teron, Jagatsing Ingti, Amarsing Tisso lapen Tarendra Brahma, MAC atum Mongol Sing Timung, Darsing Ronghang, D.U Maslai, Richard Tokbi, Ramsing Timung, Probhat Ch Taro lapen Lunsing Teron pen danglok Mukut Mahanta, Elwin Teron, principal secretary Mahadananda Hazarika, secretary Si-im Taro, deputy secretary Birsing Ingti lapen DHAC pen CEM Debolal Garlosa, EM atum Samuel Changsan pen Amendu Hojai lapen secretary TT Daulagaphu, Neijaylal Khelma, Manjit Naiding atum chetong dunsi minister Kiren Rijiju, under secretary A.C Jha angbong chingvai lo. Assam ratpangri pen kachetong dunde det lapen ardi nang ke-en dunde aphuthak minister ning ke-oi chepaklang.
Hemprek kapalong dapprangji aphan kachingvai along angtang kapaso, tangka nangkapale thor, law and order nang katerek pen danglok kaprek-kaprek akisung lapen sixth schedule heihui alam chingvai lo.
Kachingvai along KAAC pen DHAC adilung atum kapinpur dunke, jongsi hemprek nangpipe pulote inglong hini alongri aphan pokpi pen kebar asonsi paman det. Kaprek a state along article 244 (A) ajakong kelong a scale atengsi hini inglong alongri ta long dun nangji. Laso kelong dunji aphan hemprek kapachun aphan kenangsot, MoU alongta kachetok law and order ajakong nangpi nangji pulo bonta pini arni anta pachunche. Laso ajakong article 244 (A) pachunche pulote pachok un-eh lo. Lasonsi excise lapen kaprek-kaprek asaikam kenangsot ajakong kapachunji ke 244 (A) akemang pachun nangpo. Karbi Anglong pen Dima Hasao alongri arat ajak dingklui pen akar-i atengsi KAAC a session along cheparai lo. MoU kachetok asai pachun po lapen tangka nang kelo pachingtonte pin asai nang pachun pi vek po puta minister chechak. Kachingvai along Elwin Teron aphan kapachetong dun alamtoi pek lo.
Chingvaive aprang prime minister Narendra Modi aphan kapanong pinpur aloh minister of state for home affairs Kiren Rijiju arideng pajir. Kachetong dam abitung atum minister pen ghonta isi apor an chingvai det aphi Rijiju nang kachechak dun ke neli thek an nang cherap dun po lapen Karbi Anglong pen Dima Hasao alongri akisung aphuthak kachingvaiji aphan chiklo jon thom kepleng aphongtin kachingvaiji aphan apor hot. Laso atengsi tiri ratpangri pen kapachingkiji aphan Rijiju chechak lapen prime minister Narendra Modi pen nang kapachetongji aphan Karbi Anglong pen Dima Hasao pen KAAC a CEM Tuliram Ronghang pen Rijiju aphan kachoningri alam ensi prapjin pen nang kapachetong dunji aphan chechak dun.

Leave a Reply

Your email address will not be published. Required fields are marked *

October 2018
M T W T F S S
« Sep    
1234567
891011121314
15161718192021
22232425262728
293031  
Archives