ADVERTISEMENT

This area is available for advertisement. Please contact for details.

Arnivang
Get Adobe Flash player

Vothalangso, Hamren-Khanduli NEC atovar pen ahoi aphuthak prapjin pen Assam rat pangri nang chelang nangji: Holiram Terang

ASDC-KSA-KNCA chelangpet CM Sonowal aphan panongsi WKAD a DC aphan pinpur aloh kapajir

imageHAMREN, Pre 3: West Karbi Anglong District NEC atovar ningkan throksi plengdet aphi anta kapangtangte det ajok  rat atum kacheleng katora lapen halapu Assam State pen Meghalaya ahoi mate Jaintia Hills District pen West Karbi Anglong arlo aronre pen nangkapsi arnivang hem nang kikim, kachingthur amo keklem, Solar keron, police out post, Forest Check gate nang kibi pen danglok Voter ID nang kipi heihui asai nang klemsi longle phelang nang kacheraiji aphan nang klem bomlo. Lason asai kedeng bom aphita KAAC kachari CEM, EM atum lapen Assam ratpangri  atum thangnat asai kedeng thekthe det ajoine ahoi along kaiketa ame kekar lapen ason- ason alamki jut un-eh pleng un-eh detlo. Lahai kado kave akisung aphuthak kapajokji aphan pini ASDC, KSA lapen KNC atum chelangpetsi Hamren arongsopi along chesonglo lapen Assam Chief Minister Sarbananda Sonowal aphan kapanong pinpur aloh Deputy Commissioner Debojyoti Hazarika arideng pajirlo.
Pinpur aloh along kejong ke,  Congress kachari ningkan-15 lapen non BJP kachari aratpangri sitame ardi kipipe det ajok nonke Khanduli,Tadolangso,Tapat ahavar anta Meghalaya asor atum kacherai-etji aphansi arlo arlo pen bidi langno klembomlo. Kedamtang 1979 aningkan Dispur along Congress kachari ahut India aron (Indian Constitution) aloh along ketok Karbi Anglong arlo Am-ih alongsi Meghalaya Police Border Post (MPBP) nang kimlo, lasi laso a Police Border Post phri-et nangji, Laso alar West Karbi Anglong District pen Meghalaya ahoi along kedo Umwang, Mokoilum lapen Saitsema along Border Police Post akimi pinangji, Baithalangso-Hamren-Khanduli NEC atovar West Karbi Anglong District ahempi Hamren Rongsopi kehatput kapetangte det ajok beha -bepar kachoklem atum pen chenglok kecharli klimsomar anparta keso ki-un-eh ahut kachepon kachevan penang an katora chechak nanglo lasi laso atovar prapjin pen patang serak nangji puta pinpur aloh along kehang paso. Pinpur aloh prapjin pen Assam Chief Minister Sarbananda Sonawal aphan pipajir dampo pusi DC lamchak chipi. Pinpur aloh kapajir ahut ASDC ameiphu Holiram Terang kaningje ke, jongsi chiklo ejon angbong NEC atovar petangte pulote sodak pen rat kachesong asai dengji lapen kopine akasiksak dokok pusitame NEC asaikam lapen ASSAM Chief Minister Sarbanada Sonawal atumsi adaio che-en nangji pusi ningje.
Autonomous State Demand Committee (ASDC) aprang kachari ajakong kachevang thuji aphan lapen Hemprek kevanji aphan rat do-an kengkam chejor rappet nangpo pusi  choningri.
Pini labangso kachesong armu kachejeng mate pinpur aloh kapajir asai kedeng ahut KSA Central Committee ameiphu Suren Hanse, KNCA ameiphi Amphu Tissopi, ASDC Hamren District Committee ameiphu Ramsing Terang pen kechenglok song along kacherap dun jabangphu bangphi atum chetong dun.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives