ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong along khei angbong kapacharvoji meme abidi paklemkle detji aphuthak Speaker pen CEM atum MLA Momin aphan than pare nangji: JACAS

imageDIPHU, Pre 2: Kedamtang Chiti niphai 29 arni Diphu pen keklang abirta aloh along kedamtang 2013 aningkan Karbi Anglong along soluk sodak atemon kedo nang ke Joint Action Committee for Autonomous State (JACAS) atum henlo pu Bokajan MLA Dr. Numal Momin kejong damke alangli Governor aphan kelo aloh aphuthak kachehelisai alam rat aphan kapamanghuji abidilo pusi pini pherangke amai kangni ahut JACAS ameiphu pen kacherap dun atum pangdak. Alanglitum kapangdak thuke 2013 aningkan Karbi Anglong along soluk sodak atemon kejap ke JACAS atum aphan akoi arvak un-eh. Kopi apot si 2013 aningkan Karbi Anglong meh kithur nang lo? Tribal asongja lapen tribal akisung alam keklem kedam pu alam pen kacheparoka Dr. Momin ahin pen kedamtang 2013 aningkan Vosik achiklo niphai 31 arni erui sose longri arlo pi apot si soluk sodak atemon kejap ma aphuthak chini pame nangji apotlo. Kopi ajoine pensi soluk- sodak atemon kejap ma aphuthak kapangsamji aphan pura 2013 aningkan Paipai 03 arni si JACAS asong amahang patheklo. Bangso ahut jasemet pet Centre atum pen Autonomous State aphuthak kapachobai ajoinesi soluk sodak amede thur nanglo lapen lake halaso ahut Karbi Anglong kachari atum si adai dolo.
Dr. Momin ahin penke jakong lapen kachingthur ajakong kethakji aphansi ningje ver. Nelitum ahin pen KAAC aphan India aron along ketok ang Article 244(A) ateng pen Autonomous State ajakong pidet matik ke regional lapen village angdeng aphan an jakong kethakji puke chekroi dun thekthe. Jongsi ladak kachari ajakong longlo pulotangte ladak kedo inglong aso kaprek- kaprek akhei atum ta jakong thak pon unpo. KAAC ahin pen ke kopuson pensi Regional Council aphan jakong kethak unpo, athe KAAC along amatta Primary School thanbang atum aphan anta voreng anghoi pek un-eh Nelitum ahine kopine kachingthur aphan khamkhe damde, sitame kachingthur asai rui thu pame nangji. Karbi Anglong along kedo inglong aso khei barim atum aphan lapuson akachingthur pupen kaphalangno ke metune ta kroi dun thekthe.
JACAS asong ahin penke Dr. Momin ahin pen Governor aphan ketok pen kelo aloh aphan ke kipudun kali, MLA Dr. Momin ahin pen Governor aphan kapachini lapen bidi kipi aloh kelo ajakong do. Sonsi MLA ahin pen alang methang Constituency along asai amo aphuthak kaningje dun nangji abangphulo. Paragraph 1 (2) of the Sixth Schedule to the Constitution ateng pen Regional Council kaselamji ajakong aphuthak pini arni thangnat lamthe isi ta ningje dundelang. Sitame alangli Dr. Momin ahin pen inglong aso angbong kethakji kabor-ih aphuthaksi karju pado lo. Alangli Dr. Momin ahin pen Governor aphan kelo aloh along 2003, 205 lapen 2013 aningkan Karbi-Kuki, Karbi-Dimasa lapen Karbi Rengma kacharovo ahuthak halabangso ahut alam chinidam pameme pin pensi kopi kamatha pensi kejong dam ma. Anparta alangli Dr. Momin ahin pen Karbi Anglong along kedo an Karbi pen akaprek akhei anke “second class citizens” lapen “outcasts” pu kejong ponke Governor aphan kapamanghu abidilo. Lasi bangso alam aphuthak pen MLA Dr. Momin aphan sodak pen pinrem ponlo. Jongsi Karbi Anglong along kedo Karbi pen akaprek anke “second class citizens” lapen “outcasts” pulote Bokajan (ST) along pen Bilton G. Momin ahin  State Legislative Assembly (1978-83) aphan hai dundelo, Diphu (ST) along pen Kaizasong Guite ahin pen Legislative Assembly (1983-85) hai dundelo. Sonsi KAAC (1996-2001) along Lumbajong along pen Resolu Rengma ta hai dundelo, Lumbajong along ke Rengma avote ke non anta 300 avoter ta lele lang. Dr. Momin alang methang amata Bokajan (ST) Legislative Assembly Constituency along pen 2016-2021 aningkan aphrman an MLA man dun longlelo. Nelitum Rat pen kachetoidun abangphu amatsi rat aphan pachehuri sai abidi keklem aphuthaksi nelitum ahin pen karju pado.
Kedamtang Chiti niphai 28 arni birta aloh along BJP Assam Pradesh ameiphu Ranjit Kumar Das ahin pen Dr. Momin aphan keraikom aphuthaksi klanglo. Laso ateng pulote Dr. Momin ke party high command along pen khei angbong kapacharvo saiji abidi keklemji aphan hukum kelong tang angtheksi klangdak lo. Assam Legislative Assembly Speaker lapen CEM atum ahin pen Bokajan MLA Dr. Momin aphan lapuson Karbi Anglong along kedo khei angbong kapacharvo sai meme abidi kapaklemkledetji aphan than pare nangji pusi pini DPCKA asaihem along kapado pherangke amei along JACAS ameiphu Khorsing Teron ahin pangdak pon.
Pherangke amei along JACAS Convenor Samsing Hanse, Convenor Stalyn Engti, sankur chunbang George Timung,  chunbang Samsing Hanse, klembang Dorsing Terang  atum chetong dun.

Leave a Reply

Your email address will not be published. Required fields are marked *

October 2018
M T W T F S S
« Sep    
1234567
891011121314
15161718192021
22232425262728
293031  
Archives