ADVERTISEMENT

This area is available for advertisement. Please contact for details.

Arnivang
Get Adobe Flash player

PMAY-HFA (urban) ahem bang 456 keron amai ingni

Diphu, Chiti 30: KNLF Rongbin aklam adung kedo Rehabilitation Centre for Hawker and Vendor ahem along Pradhan Mantri Awaj Yojana (PMAY) HFA (Urban) ahemso keron amai pangni.
Diphu Town Committee EE Nippu Dutta kachepahemphu amai along alohi sarpo aman pen HAD Minister Sum Ronghang chetong dun. Pha pangjang alohi aman pen KAAC CEM Tuliram Ronghang chetong dun.  Anparta EM Amorsing Tisso, EM Torendra Bramah, MAC Mongalsing Timung, Town and Country planning Deputy Director Reuben Ronghang atum pen chenglok penang an man kedo abangphu phi atum chetong dun.
Bangso amai along sorkar pen kedeng PMAY urban aphan pu panongsi kedamtang achiklo kachoningri aloh kejok dun ateng pini ward no. 1 pen ward no.10 angkang pangrumpet 456 kachoningri atum aphan deng lo. Bangso PMAY a scheme Model 1 along hem kachikimji sika Lakh 2.99 atangka piji, Model 2 along sika lakh 2. 8, Model 3 along sika lakh 2.66, Model 4 along sika lakh 2.35 lapen Model 5 along 2.50 lakhs atangka do. Lasi, laso a model along kolo abangsi chongvai dunji halaso atengsi longpo.
Hem kekimji aphan methang alongle patta dovek nangji. Lasi patta kave atum mate hem isi along akesar amensi patta dochot pulote prapjin pen asomar atum aphan amen thapra Advocate pen affidavid klem nangji. Lasi, pini 1st phase lapen 2nd phase atum aphansi along loh kejok dun bang 456 atum aphansi pini hemso ron lo.
3rd phase along kelong dunde atum aphan amen lapen kachoningri aloh kapaleji aphansi choningri. Anparta laso a scheme ateng kado kave atumta long etji ladak voreng kedo atum anta aloh jok dun long lapen loan en pen ahem kapatheji aphan varsai do. Karbi Anglong Town Committee kaparlo anke bangso a scheme long etji lapen kerap kipi lo, lasi tangka chitu thu nangne lo pusi KAAC CEM Tuliram Ronghang jai.
DTC kaparlo angkang pangrum pet 2,929 atum choningri aloh jok dun lo. Seta 456 atum aphansi PMAY-HFA Urban ahemso scheme aphan ingvai un chot lo. Athe ejahak atum methang alongle patta kave det ajoine lo. Lasi sixth Schedule angkang apot longle kave pen akisung atum aphan KAAC pen ardipi nangji lapen cherap dun nangji pusi HAD Minister Sum Ronghang jai.                    
Bangso ahemso kikim kerang along middle man ave, komane jongsi PMAY ahemso long pulote methang atumsi kimpo lapen methang account alongsi tangkata chethap po. Lasi pini 456 PMAY ahem kelong dun atum aphan an Durga puja aphang sika suri phokep atangka chethap po. Laso aphi sika suri trok kep, laso aphi sika suri trok kep atangka chethap po.  Lasonsi pangrup pet ehum ahem along sika 2.10 lakhs atangka chethap po. Jongsi ahemso abang bangso ahem amen pen methang atangka pu kachtin pen cho inghu det pulote sorkar atum pensi ingsai po puta mai along jai.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives