ADVERTISEMENT

This area is available for advertisement. Please contact for details.

Arnivang
Get Adobe Flash player

Inglong alongri akisung do-an kapajokji ke regional asong AGP anchot lo: Atul Bora

Diphu along AGP klembang amaipi kangni, pharo sose arat AGP along kachingbe dun

imageDIPHU, Chiti 30: Inglong alongri arlo BJP pen danglok Congress lapen kaprek-kaprek ratchari asong atum kevangji MP kilik apharman jakong kachepherang asonsi AGP asong atumta jakong chepheranbglo. Laso ajoine pini AGP Tiri jabang atum kachetong dun pen Diphu arongsopi along klembang amaipi pangni. Diphu, Bokajan lapen Hamren district Committee chelangpet pen Diphu club along kangni AGP klembang amaipi along AGP Diphu District Committee ameiphu Samsing Kro mai chepahemphu lapen AGP tiri ameiphu mate Agriculture minister Atul Bora alohi sarpo aman pen chetong dunsi AGP working president mate minister Keshop Mahanta, Chief Minister barim Prafulla Kumar Mahanta lapen ongdung tiri along kacherap dun abangphu bangphi anparta district along kacherapdun abangphu bangphi atum chetong dun. Mai along alohi atum lam thanthe aprang BJP, Congress, ASDC lapen ASU jabang barim atum jokjak bang pharo sose atum AGP along chepa-ok dun lo. Alanglitum aphan meiphu Atul Bora AGP apoho pen arvaksi song along denglo.
Laso aphi Mai along meiphu Atul Bora kejaike, kedamtang MAC kilik ahut AGP ahin penta ajahak Constituency along bangphu parjap dunlo. Aprang pen chisik long pameka asonte elong longnike AGP penta kehai dunji angring do. Inglong alongri along rat atum AGP asong aphan puthot nangkangrom ponlo pu abangke angthek chelonglo. Kedamtang AGP atum chari ajakong kelong ahut son 30 a asaikam KAAC aphan pajirlo. Asai klem klemkle abangke neli pudamde setame nelitum kechari ahut kopima kapajir nangji anke pajirlo. Voiphit setame non aphi abangke mate nelitum jakong ave detlo pu aphi penke ladak rat aphan kapachingthur nangkelo atangka kecho panglim et ajoinesi pini sankur arat atum kisung chechak nanglo. Lasi rat atum ratpangri, KAAC lapen Administration aphan kelang pangching dun nangpo la ansi kachingthur ahin akaprek atum pen chingbar dun un po pusi ningje. Alangli kaningje thuke AGP regional asong amahang kapathek lake Assam along arat atum kisung-keboi do-an kapajokji aphan. Kedamtang Assam kachesong ahut Karbi Anglong penta chepaduk dunde puke maduta chekobir un-eh. Nelitum kechari ajakong ahut ladak pen karlitang Samsing Hanse minister manlo. Halaso ahut alangli kejalin pen Karbi Anglong along penang an kachingthur asai klemlo. Setame angbong malom AGP asong chepardunron kerem ajoine katikuk ason dolo. Setame rat atum non pijo-pijo pen munthilo regional asong ke mantunta vire latumsi kisung-keboi do-anta pajokpo pu ajoinesi non AGP asong aphan jakong pangtang dun bomlo. Karbi Anglong along ason ason akisung pen danglok Article 244 (A) Autonomous state apharman kachesong sunlo. Lasi kachingthur chingbar rapji aphan tiri ratpangri atumta laso aphuthak abangke ardi pi nangji pusi ningje. Citizenship Amendment Bill 2016 aphuthak alangli ningjesi. Tiri ratpangri atum jongsi labangso a bill parliament along dengdet pulote Assam along kedo arat atum kisung chechak nangpo lapen jutang-jubat- elam-eki anta vir-etpo lasi laso along abangke AGP matuneta chekroi dunde lapen kachesong arjap thipji pui ningjesi non kevangji apor nanglitum inglong alongri alongta AGP ajakong pangtangsi asitin kilik alongta chepahai nangpo. Kedamtang MAC kili ahut nelitum pen penang an kithurmi atum aphan abangphu ticket. Apor jumhek pen pusetame alanglitum along penang an arat cheto dunlo lasi alanglitum aphan lapen kacheto dun arat atum aphan chorlolo lasi kevangji arni setame kilik kithur dun abangphu atumsi ladak AGP asong ajakong kapangtangji aphan jalinpo pusi meiphu Atul Bora pinkhat.
Halapu Chief Minister Prafulla Kumar Mahanta kejaike, kedamtang arni ladak pen bangphu kachotoi dun karlitang Samsing Hanse alangli non ilitum angbong along ave det pusetame alangli kereng-et ahut inglong alongri kapachingthur asai keklem det kali AGP asong ajakong kapangtangji aphan kabor-i abangphulo. Kedamtang penang an arni pen Inglong kethom a district along kisung dopik setame Congress chari ahut thangta pajok tekangke detlo pu akoi pisi ladak jonghele khei do pusetame arnisike isivet alongklam along dosi arjap rappet nangpo. So-arlo ahin pen langdam pulote Assam along penang an so-arlo atum paprang dunlo lasi Assam ke mantuneta paphi dunhuphe. Lasi non kithurmi a-ove atumsi Assam kapaprang ponji aphan arjap nangpo pusi choningri. Lason thak thaksi minister Keshop Mahanta setame Inglong alongri along AGP asong kapatangji aphan ason ason alam pikhatsi kevangji arni ansose keklem kedam kachepadukji aphan choningri.

Leave a Reply

Your email address will not be published. Required fields are marked *

October 2018
M T W T F S S
« Sep    
1234567
891011121314
15161718192021
22232425262728
293031  
Archives