ADVERTISEMENT

This area is available for advertisement. Please contact for details.

Arnivang
Get Adobe Flash player

Assembly Speaker pen Rajnath Singh isivet abidisi keklem: ASDC

Diphu, Chiti 30: Jongsi non kevangji Pre 5 arni session kangni ahut Karbi Anglong pen North Cachar Hill apharman state alam cheparai thekthe det pulote Assam Chief Minister pen kepha nangji amai Assam Assembly Speaker Hitendra Nath Goswami pen kepha rong ke rat aphan amek kapalu asonsi manpo.
Kedamtang parliamentary kilik ahut non kedo bom Home Minister Rajnath Singh keklem alongsi Assam Assembly Speaker Hitendra Nath Goswami kepha amai ta vote kapangrum iji aphan chot ason naknak pusi Autonomous State Demand Committee (ASDC) atum jong.
MLA Sum Ronghang, MLA Joyram Ingleng, MLA Dr. Mansing Rongpi, MLA Dr. Numal Momin lapen MLA B.B. Hagjar atum aphan Karbi Anglong arlo karklok bop alam aphuthak Karbi Anglong arat atum pen than dunplir nangji lang puke kalilo.
Kachongthui chotji meme pu chinilor aphita ASDC ameiphu MLA barim Holiram Terang pen penang an Karbi Anglong arlo karklok bop alam heihui jongdunsi Assam Assembly Speaker aphan tok lo.
Laso ahut alangli kejong dun angbong ajahak alam ke, Karbi Anglong pen North Cachar Hills aphan hemprek, ahoi alamki, Bodo atum aphan ST(H) pilongle lapen inglong aso atum aphan an NRC along palut et nangji pu heihui alamsi jong dun lo.
Karbi Anglong arlo PHE scheme along crore-crore atangka kapanglim along kacherap kedo dun vek abangphu MLA Sum Ronghang aphan Cabinet Minister anghoi pen pasung nangji pusi Autonomous State Demand Committee atum pen Assam chief minister Sarbananda Sonowal aphan choningri.
Inut kechopanglim along kacherap dun kedo vek abangphu aphan Cabinet along adim kepek pon ke chelongle puta ASDC atum jong dun. La-an chot kali MLA Sum Ronghang ta amethang chemathasi arpu pen che-oh nangji puta ASDC atum jong pusi ASDC pachethang aro a klembang Kamalsing Bey birta pachetak.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives