ADVERTISEMENT

This area is available for advertisement. Please contact for details.

Arnivang
Get Adobe Flash player

Duarbagori BJP atum akisung alam CEM pen kachingvai

Mohiram Terang aphan VDC Chairman pipo pu alamthe pen CEM aning kapangsam dun

Diphu, Chiti 29: Kedamtang Karbi Anglong Autonomous Council kilik jutdet pen Duarbagori Constituency a BJP atum akisung aphuthak pini Karbi Anglong Autonomous Council a CEM pen pen Council along kachingvai. Duarbagori Constituency angkang along BJP asong kapatang aphan karjapthip lapen BJP ke-otthip abangphu Mohiram Terang aphan VDC chairman anghoi pekpo pusi CEM Tuliram Ronghang chak dunsi kado kave aphan aning pangsam dun lo.
Pinpurme, kedamtang arni Kekang adong Handloom & Textile asaihem kikim kerangji aphan long-eh kesom amai along BJP EKADC ameiphu EM Roton Teron athengnosi Duargari a constituency a BJP atum akisung alam chethan dun lo. Laso ateng meiphu Roton Teron pen Diphu kevangji aphan pha tekang lo lapen State BJP ameiphu Ranjit Das pen Chiti 27 arni Diphu kevangji ahut kapachetong dunji aphan chechak tekang lo.
Laso ateng Chiti 27 arni Diphu Circuit House along Duarbagori Constituency a BJP atum State BJP ameiphu Ranjit Das aphan chetong dunsi kado kave alam chingki chethan lo.
Laso ateng CEM Tuliram Ronghang pen kachingki chethanji aphan pinkhat tekang lo. Alangli kapinkhat atengsi pini Council along BJP EKADC ameiphu Roton Teron, dun meiphu Rolen Killing, CEM Tuliram Ronghang, MAC Richard Tokbi lapen Duarbagori a BJP atum chetongsarsi ardi doklong amai ingni lo. Laso amai along Duarbagori BJP atum pen kado kave akisung alam lapen kedamtang arni pen BJP along keklem kedam alam heihui klardak pen chethan lo.
Laso ahut CEM Tuliram Ronghang pen Duarbagori Constituency a BJP atum kaningri alam ning chepaningding pensi arju dun lo. Kado kave alam arju dunde aphi BJP Duarbagori lapen MAC angbong kachelengpet pen kedoji aphan CEM Tuliram Ronghang pachini dun lo.
La-an chot kali Duarbagori Constituency BJP atumta kachari ajakong mate kachingthur asai kelong dunji aphan pusi hako pen BJP along kedo thip abangphu Dolamara Men Phangcho arong amekar kt. Kirtonsing Terang asopo Mohiram Terang aphan VDC chairman anghoi pekpo pusi CEM Tuliram Ronghang chechak dunsi aning kiduk pen kedo Duarbagori BJP atum aphan aning pangsam dun lo.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives