ADVERTISEMENT

This area is available for advertisement. Please contact for details.

Arnivang
Get Adobe Flash player

Patta kedolor Karbi Anglong alongle angtan asor kacherai bor-i

Dolamara, Chiti 21: Ahoi kedo arat akisung komantu lo kejokji? Thero ahim kilin ason ihi bengchet, ihi korchet amat ave det asonsi man lo.
Duarbagori constituency arlo Rangsali pen Lokho adak ke Karbi Anglong si kaparlo lang pu Silonijan Revenue Circle a ARO, mondol atum pen kapatinilor atengsi inut Rongsangti amekar Zetli Tokbi pu abangphu chiri pharo isi ra troksi kep an alongle meyadi patta cheselamsi medu ta pibom lo. Ningduk meme alam ke Golaghat district, Numaligarh ahavar Mohori Pathar ansi Karbi Anglong pen chepahoi lo, seta Lokho Anglong anta nang kecheraiji aphansi alanglitum nangbor-i lo pusi longle patta kedo abangphu Zetli Tokbi chethan. Athe ‘Neli sah kacho-ehji aphan adim pan dam lo, seta sah nang pa-eh longle det lapen lake Karbi Anglong alongle kali lo pu ningjesi nangkhang thip lo.
‘Neliphan nang kipu lapu-an ke sah nang-eh ri non, athe nelitum theng lo han cho-en athai ave detpo nanglitum alongle kali lo pusi Mohori Pathar arat ningje rinti’. Laso ahut Zetli Tokbi thak dunsi lake Karbi Anglong alongle lang lapen lake mondol pen ARO atum aphan hang pen chingki etsi meyadi patta ta ke en lo. Patta a Dak No. 55 pen 58 an selam lo lapen medu ta pi bomlo pusi Tokbi asanglo chethak dun lo, bonta Mohori Pathar asor kroikre det lo. Laso alam aphuthak MAC Richard Tokbi aphanta Tokbi asangho choningri dam lo. Halaso ahut prapjin pen KAAC CEM pen chingki pipo pusi MAC chechak dun lapen un-an pen nang cherap dunpo puta MAC Tokbi asangho chak dun lo. Lapuson alangli kachechak apot choro lo.
Karbi Anglong alongle patta kedolor aphita angtan asor Karbi Anglong alongle kali Golaghat district alongle pu nang kachekroi dun thip pen methang alongle along sai kacheklem longle det ke ningduk meme lapen isi ketherak meme alam binong pusi Zetli Tokbi chethan. Lasi neli patta kedolor Karbi Anglong alongle along neli sai kachotiki longji aphan Karbi Anglong Autonomous Council a CEM, MAC lapen kaprek-kaprek hamphang asong atum nang kacherap kacheto dunji aphan tovar cholang dinglo pusi pherangke atum athengno Zetli Tokbi ningje.
Ahoi kedai kedo arat atum lapusonsi aphong-aphong kisung chechak nang lo. Lasi ratchari atum pen chenglok Karbi Anglong arlo kedo hamphang asong do-an atum Karbi Anglong pen Golaghat district ahoi along kedo Karbi arat atum akisung aphuthak nang chejok dunsi nang pajok dun nangji puta Zetli Tokbi choningri.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives