ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong pen Dima Hasao aphan birta keme

Sixth Schedule Amendment

MoS alamdon ateng pen KAAC along 50, DHAC along 40 anghoi batpo

GUWAHATI/DIPHU, Chiti 21: Kedamtang ninkgnan troksi aprang UPDS, DHD asong atum tiri ratpangri atum pen kachetok MoS alamdon ajakong kelong etji anatthusi dambomlo. Laso MoS sixth schedule amendment 2014 ateng pen Karbi Anglong Autonomous Council (KAAC) pen Dima Hasao Autonomous  Council (DHAC) anghoi batpo. Kedamtang Chiti niphai 21 arni Delhi arongsopi along union home minister Rajnath Singh kachepahemphu home ministry along kachingvai amai ahutsi laso alam pangdak lo. Meghalaya a chief minister Conrad Sangma, Tripura chief minister Biplap Dey lapen Assam ratpangri pen minister Chandramohon Patowary pen Chandan Brahma anparta ongdung tiri pen state asaikam saiphu atum kachetog dun bangso ardi dojot kachingvai amai along MoS alamdon ateng pensi KAAC along anghoi 50 lapen DHAC along anghoi 40 an pabatpo pusi lamrai denglo. Kachingvai amai jut det aphi minister bang hini Chandramohon Patowari pen Chandan Brahma atum kaningje ke, India a constitution sixth schedule amendment aphuthak laso amai along vaidak pen chingvailo pu pachinisi laso amendment ateng pen Assam along sixth schedule kaparlo ahavar malom aprang aphante ansose jakong longpo. Non amatke KAAC along inghoi 26 lapen DHAC along inghoi 21 do. Kedamtang arnike State Election Commission pensi kilik pangdak bomlo setame akimi amendment det aphilo lote KAAC along inghoi 24 lapen Dima Hasao along inghoi 12 an batpo. Laso atengsi pangrum pen KAAC along inghoi 50 lapen DHAC along inghoi 40 dopo. Halapu constitution No. 280 clause amendment si tiri ratpangri pen kapajir atangka sixth schedule ateng pen Council along pale thor longpo puta minister Patowary ningje. Alangli kaningje thuke  constitution No. 280 clause amendment det aphi tiri atangka aphuthak Karbi Anglong pen Dima Hasao Autonomous Council along ansose kejokvan dopo lapen ladak Assam ratpangri atum keklem nangji athai avelo. Minister Patowaru kaningje thuke laso amendment ateng pen sixth schedule kaparlo atalom along kilik ateng pen panchayat committee asonsi village council sengpo lapen rong-rup atok ano anta laso ajakong lesi chingthurpo pusi ningje.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives