ADVERTISEMENT

This area is available for advertisement. Please contact for details.

Arnivang
Get Adobe Flash player

Hidipi along zonal festival katalonji aphan tirikam amei keseng

Diphu, Chiti 21: Borjan Havar Amei atum pini Hidipi ahithi adung Jutang Aklam methang saihem along Janasing Teron chepahemphusi ZKYF katalonji aphan Theman arni tirikam amei keseng amai ingni.
Mai along Janasing Tokbi alohi kapachini apor en. Alohi sarpo aman pen KAAC chairman Longki Timung chetong dun, anparta KCS tiri dun meiphu Humsing Bey observer ateng pen chetongdun lapen KCS tiri klembang Kamalsing Bey, KCS tiri amei pen Tokeswar Terang, KARAA chunbang Darsing Hanse, Harsing Kramsa, Hidipi LAMPS chairman Samson Ingti, KSA Dillai Head Branch ameiphu Nobin Rongpi, KNCA pen Jenna Katharpi, KSA Bokajan District Committee meiphu Raju Ingleng lapen man kedo atum chetong dun.
KCS Hidipi Zone meiphu barim Lunse Ronghang mai kepha alamthe jai. Laso ahut alangli kejai ke, kevangji 26 angdeng Zonal Karbi Riso Nimso Rong Aje (Zonal Karbi Youth Festival) apharman tirikam amai keseng lapen mesen pen kosonsi kapachun thekji pu heihui alamthe jai lo.
Mai along kachetong dun alohi atum pen kevangji ZKYF kapadoji adim lapen mesen pen kepachunji aphan tirikam amei keseng akenangsot alam lapen bidi-sore pi dun rinti.
Mai along KCS dun meiphu Humsing Bey ta Karbi ajutang alam lapen kaprek-kaprek along kedo Karbi atum methang jutang lapen alam-aki chipangbo bom alam than. Lasi non pining penke jutang anatthu ansose alon lapen ardi kipi pen kapamesenji alam heihui aning parung.
Mai along penang alam chingki-chingvai det aphi kado kave chedonsar pen Samson Ingti aphan meiphu, Dorsing Hanse aphan chunbang, Sarsing Ingti aphan saihem chunbang, VDC chairman Khrist Rongphar pen Sekhor Singnar dihin chunbang pek lapen kachetong dun kedo-an atum aphan klembangphu-phi pek lo.
KAAC chairman Longki Timung un-an cherap dunpo pu chechak lapen jutang arong-aje mesen pen kapachun thekji aphan bidi-sore pidun.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives