ADVERTISEMENT

This area is available for advertisement. Please contact for details.

Arnivang
Get Adobe Flash player

Autonomous State longle aprang MLA Momin Article 244(2) kapaklang ke amo kevangve asai: KSA

Diphu, Chiti 21: Bokajan LA a MLA Dr. Numal Momin Article 244(2) ateng prapjin pen khei ateng pen regional council pen village council seng nangji pu Assam a Governor aphan kido kapale aphuthak KSA (Inglongpho) atum ningkangsamse chepaklang. India constitution along ketokdak Article 244(A) autonomous state chunche aprang alangli lahai alam kaningje ke amo kevangve asai lo pusi KSA atum jong pusi KSA rap pachethang chunbang Sotrosing Tisso birta pachetak.
Karbi Anglong arat apharman bangphu jasemetpet Assam Legislative Assembly a MLA pu kachipu ke alangli kechengsi Karbi Anglong arat akemang autonomous state aphuthaksi klem paprang nangji, akaprek ratchari alamle kapathe nangji kali.
Sixth schedule alongri arlo kedo khei barim inglong aso atum aphan kopi ale kelong nangji ason kedo-anta autonomous state alongsi do-etlo. Lasi autonomous state kelong lote laso ahavar along kedo khei barim inglong aso atum amethang kelong nangji ateng chelong reppo puta KSA (Inglongpho) atum jong. Lasi Karbi Anglong arlo khei barim atum kaprek-kaprek akisung pen kachepajokji aphan ke autonomous state kapachun anvet lo. Lasi Article 244(A) chunche aprang kaprek-kaprek ratchari akemang alam kapaklang ke Karbi Anglong arat aphan amek kidip asai chot lo.
Bokajan LA a MLA Dr. Numal Momin rat aphan ahokpet matha pulote tiri ratpangri along Article 244(A) kapachun serakji aphansi chingki-chethan dam nangji apot lo pusi Karbi Students Association atum pachini pusi KSA rap pachethang chunbang Sotrosing Tisso birta nang pale.
Kipri tang klempar asong UPDS lapen tiri ratpangri, state ratpangri angbong kachetok MoS alamdon kichun ke kithirklong asai kali, lasi autonomous state chunchetik ke kithirklong asai (permanent solution) vang un-eh. Lasi kithirklong asai autonomous state kapachun serakji aphansi MLA Dr. Numal Momin klem nangji puta KSA atum jong.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives