ADVERTISEMENT

This area is available for advertisement. Please contact for details.

Arnivang
Get Adobe Flash player

NRC along son 5 a document dengde lo

GUWAHATI, Chiti 19: Assam along kapadovoi NRC asai angdeng along nonke son pho aloh (document) dengdelo pusi supreme court lamrai pi. Kedamtang Jakhong 30 arni NRC final draft list pangdak det aphi bang 40 lakh sose atum amen klang dunde det lo. Laso aphi puthot NRC along men kachethap lapen komane atum amen kechokche padet-padat do pulote kachepakengji aphanta avarsai pilo setame NRC along amen kachethap dunji aphan kachoningri aloh son pho document ingthan nangji pusi NRC state coordinator Pratik Hazela kachoningri atengsi supreme court ta denglo. Laso atengsi son 15 document angbong pen nonke son 10 ansi dengchot po. Hazela kapajir affidavit khamkhesi (oppose) Assam Public Works (APW) atum kachoningri aphuthak justice Ranjan Gogoi pen F. Nariman atum hearing kapadoji aphan denglo.
NRC along son pho document kedengde ke ration card, 1951 aningkan NRC aloh, 1971 There 24 an kedo a voter list, 1971 There 24 an kapajir citizenship certificate lapen refugee certificate. La son pho a document kangthan aphuthak khamkhesi ajahak asong Assam Public Works, Hoseton Nagarik Manch, AAMSU, Jamiyat Ulema atum Court along laso aphuthak choningri dam.
Halapu kachoningri apor ni 30 alar ni 60 an supreme court pabat lo lapen Chiti 25 arni pen halahai aloh dengpo. NRC along amen kedotang atum aphuthak ta jongsi kechokche dokok pulote choningri longji. Tiri atum methang alam kachipi aphuthak Pratik Hazela aphan ni 15 angbong affidavit pajir nangji pusi supreme court pinkhat athe tiri ratpangri atumta la son pho document kangthan aphuthak kekhamkhe dun dolo, lasi laso aphuthak kevangji Pre achiklo niphai 23 hearing ingniji.
Phant 93 kachoningri atumke kedamtang 1951 aningkan NRC pen 1971 There 24 arni an a voter list si enlo pusi laso aphuthak Pratik Hazela supreme court along pachini. NRC final draft list aphuthak ajat alam jaimek (report) ta tiri ratpangri, state ratpangri lapen assembly along kapapipe detji aphansi supreme court pinkhat.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives