ADVERTISEMENT

This area is available for advertisement. Please contact for details.

Arnivang
Get Adobe Flash player

Koilamati along HSDC, KSA, SYJ, SYC atum tovar karangkha

Diphu, Chiti 19: HSDC, KSA, SYJ, SYC atum BBDC atovar Silonijan pen Chokihola adak tovar kapatangte det lapen Deigrum alangroi RCC adolong pini arni anta kaselamle aphuthak pini anerlo porphai 12 apor No. 25 Nilip MAC Constituency angkang Koilamati ahithi along ghonta hini apharman tovar karangkha.
Kedamtang 2010 aningkan pen kaselam adolong pini arni anta kapatangte det apotsi pini lapuson kachesong asai deng nangkok lo pusi SYJ CC ameiphu Ajay Kathar, Nilip HSDC Constituency chunbang Longki Phangcho, KSA BDC ameiphu Raju Ingleng, HSDC CC chunbang Laichan Ingleng, HSDC BDC chunbang Anthony Kathar lapen Thomson Rongpi atum than.
Laso adolong kikimji aphan inut India pen angtan kedo Afganisthan asor Alam Khan aphansi ajakong pilo. Kedamtang arni laso adolong aphuthak contractor Alam Khan pen KAAC CEM Tuliram Ronghang atum angbong 2018 Matijong achiklo an patang vekpo pusi isi lamdon chetoklo. Seta alamdon ke lam jongjong asonsi mandet lo. Athe pini arni anta keklemji aphan chethan letle lang. Laso pen lang dam pulote lake KAAC atum aphanta kelang plot ason man det lo.
Halapu rat atum ke arnivangsi kacheleng kasiksak kethetan ajok sai jokje puthot pini lethotta rat lapen school osomar atum chingrumsi kachesong asai deng lo. Lasi Nilip arat ke kisung binonglo apotsi kemesen kacheleng atovar avetik ke kachesong ingtonte puta jai.
BJP ratpangri atum kaiketa Parivartan alam ningjever seta pini Nilip ahavar along Parivartan ke thek longle pin lang.
Lasi non prapjin pen tovar lapen Dolong asai deng serak nangji kali pulote kevangji arni la-an sose kachesong asai kethe deng nangkokpo lapen sai jokje pulote lamhoi anta kipiji aphan chisik ding lo pusi HSDC sankur chunbang Laichand Ingleng jai.
Pini laso tovar karangkha along pangrumpet bang pharo pho sose arat chetong dunsi ardi dojot pen tovar lapen dolong apharman kachesong pachun lo.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives