ADVERTISEMENT

This area is available for advertisement. Please contact for details.

Arnivang
Get Adobe Flash player

Det longri aphan phurkimo kibi Pakhila Ingtipi, Rajen Rongpi, Sikari Inghi atum aphan kedeng

Chiti 18 arni alanglitum aphan Joysing Doloy along kedeng-archoji

imageDIPHU, Chiti 16: Det longri apharman isi thedung aphurkimo kibi Pokhila Ingti Katharpi, Rajen Rongpi, Sikari Inghi lapen arisangho atum do-an aphan pini alir-alon pen denglo. Kedamtang Chiti niphai 7 arni pen 15 arni an  kapado Malaysia adet Penang pu adim along Asian Pacific Masters Games along ason-ason kapathu dun pen ser alek pen tam alek kevan abangphu-bangphi atum pini methang alongri nangkachele ahut mir alek mir abitung lapen Karbi apoho pen archosi alanglitum aphan man-peng pen denglo. Masters Games Federation a rap chunbang Dhansing Rongpi kejalin Karbi Anglong pen kapathu dun abitung atum aphan pini arnikangsam porphai hini ra achitim apor Parakhowa along nangkele pen kaprek-kaprek asong lapen rat atum deng dunlo. Laso aphi Dokmoka, Langhin, Phuloni, Tarabasa alongta kedeng archo dunsi puthot Bakalia alongta Shreemanta Sankardev Sangha Bakalia aro, Lekhika Samaroh Committee lapen Bakalia Sports Association atum poho lapen mir abitung pensi deng lo. Bakalia United Karbi Club alongta Karbi Students Association (KSA), Assam Jatiyatabadi Yuva Chantra Parishad (AJYCP), Karbi Lamet Amei (KLA), Langpher Riso-Nimso Aterank (LRNA), Karbi Employee Association (KEA) lapen Jirpo NGO atumta dengdunsi Pokhila Ingtipi, Rajen Rongpi lapen Sikari Inghi atum aphan archolo. Lason thak thaksi Longnit, Manja along ta dengdunlo lapen ladak Diphu arongsopi alongke KSA asaihem, Rongpharpi Rongbe police point along Karbi apindeng-sumpot chingthang pamekasi cheng, mori pongsi kithip ketheng pensi alanglitum aphan denglo lapen archolo. Non kevangji Chiti niphai 18 arni Pokhila Ingtipi, Rajen Rongpi lapen Sikari Inghi atum aphan kedeng karcho asai biji pusi birta longdun.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives