ADVERTISEMENT

This area is available for advertisement. Please contact for details.

Arnivang
Get Adobe Flash player

‘Swachhta Hi Seva’ Karbi Anglong arlo DC pen-pen kangpu

imageDiphu, Chiti 15: Mission 100 lapen Swachhta Hi Seva pu tiri ratpangri pen kedeng ateng Karbi Anglong Autonomous Council kaparlo PHE asaikam atum pini Karbi Anglong a Deputy Commissioner Mridul Kr. Mahanta, ACS aphan pangpu lo.
Diphu Govt. Boys HS School along pini ‘Swachhta Hi Seva’ kangpu amai along Diphu PHE (Rural) Division a Executive Engineer Bimal Chandra Sharma mai chepahemphu. Laso amai along KAAC Deputy Secretary Pratima Barman, DGBHSS a principal Benting Terang, DGC Asst Prof. Ranjit Hanse pen chenglok kaprek-kaprek man kedo atum chetong dun.
Pirthe along ¼ si longle dochot, ¾ ke langsi cherai lo. Lason ahut global warming ajoine inglong aphuchong along kibui tan a borop heihui ingjirsi lang pathe bom lo. Lasi lahai pen kachepajokji aphan plastic ahormu polythene pen chenglok kaprek-kaprek plastic pen kaselam ahormu ke-en pajum nangpo. Global warming aphan chot kali, bonta monit a ok apran aphanta kanahok thetan khangjang puta alangli jai.
Angtan along barpi kedo pen ajok lang temon aphan paterpik khangjang. Lasi angtan along barpi kedo ta ington nangpo lapen kaprek atum aphanta than pare nangpo puta than dun.
1st pen 2nd pirthe adang aron (world war) ke monit angbongsi chedan lo, seta 3rd world a pirthe adang aron ke lang temon aphan mesen kapadoji aphan kacheraikom aronsi chedan nangpo puta DC jai.
Pini pen pangchengsi non kevang Pre 2 ingdeng 150 det apo Mahatma Gandhi mahang kethek arni an aphan India ratpangri pen ‘Mission 100’ pen ‘Swachhta Hi Seva’ asai deng lo. Laso ateng Karbi Anglong arlo apharman neli ingpu lo pusi mai along deputy commissioner Mridul Kr. Mahanta jai.
Mai along kachetong dun deputy secretary Pratima Barman, DGBHSS a principal Benting Terang atum mai along kachetong dun charli osomar atum aphan kachepangthir akenangsot alam than pajirmi.
‘Mission 100’ pu kopi aphansi kipi damma pu aphuthak Project Co-ordinator mai along than. Inut karjulong pen bang pharo atum along laso abirta pale nangpo mate kachepangthir aphuthak than nangpo pu aphansi Mission 100 pu kipu dam pusi than. Mai pachekak det aphi deputy commissioner Mridul Kr. Mahanta pen chenglok alohi atum pen pangchengsi Diphu Govt. Boys HS School along thengpi aklim eh lo lapen Swachhta Hi Seva kangpu angthek DC jalinsi school apai biri arlo arkok lo.

Leave a Reply

Your email address will not be published. Required fields are marked *

September 2018
M T W T F S S
« Aug    
 12
3456789
10111213141516
17181920212223
24252627282930
Archives