ADVERTISEMENT

This area is available for advertisement. Please contact for details.

Arnivang
Get Adobe Flash player

Denarong arong along ingdeng 45 Inter club football angdung kiti

DENARONG/BAKALIA, Chiti 15: Dengaon Sports Association (DSA) patirpisi Denarong pathu aklam along kedamtang Jakhong achiklo niphai 28 arni pen kapathubom ingdeng 45 inter district prize money football championship pini angdung kiti pathu. Pangrumpet pen terank 27 atum kachepate dun bangso kapathu pini angdung kiti kachepho ke Chikong arong Sirvovomu Club pen Bampathar Rongmili Club angbongsi chepho. Apor kehot ateng pen kapathu chengsi hin-hin a terank atumta kachepahaiji aphan un an chitinglo setame kechengsi angkung kapathu ahut ke pu-pu ta goal chipi thek vangve det. Puthot angkung kapathu ahut ta chedaikoisi dokoklo, bonta minute 22 kechok ahut Sirvomu Club ahin Romen Terang ball ipum thaplo. Halapu Rongmili Club atumta kachitu dunji aphan un an bor-i lo setame un-eh detlo, laso ajoine goal isi pen Rongmili Club atum remdun detlo. Laso aphi nong-eh kapajir amai along CEM Tuliram Ronghang alohi sarpo aman pen danglok deputy chairman Ritesh Inghi, EM atum Jagatsing Ingti, Khonsing Rongpi, MAC atum Horensing Bey, Lunsing Teron, Ramsing Timung, Richard Tokbi, Prabhat Chandra Taro lapen Dorsing Ronghang lapen Ranger Rajen Rongpi lapen ongdung aman kedo atum chetong dun. Kachetong dun alohi sarpo lapen alohi atum arideng pensi kehai aterank atum aphan sika 70,000 pen nong-eh lapen krem aterank atum aphan sika 5,000 pen nong-eh pajir dun. Halapu ball kenep ketheknei anong-eh Chihon Bey lapen kapathu kemenei anong-eh Goutom Teron anparta goal kethap ke-ongnai Sing Rongpi atum phansi nong-eh pajir lo.
Karbi Anglong Football kapathu pen chenglok kaprek-kaprek kapathu ahinta kethek dunji aphan akemang pensi nelitum 26 constituency along sika 26 crore atangka panongsi stadium, indoor stadium pen danglok ason-ason kapathu alongklam kaselamji aphan sai kedeng pangchenglo pusi CEM Tuliram Ronghang ningje. CEM kaningje thuke dak pensi ili Karbi akhei atumta angtan an pathu dunlong po. CEM Cup amen pen Dongkamukam along Morning Star pen Bhutan angbong arnisi one day match kapapathuji aphanta chisik bomlo. Lasonsi India pen angtan adet atum aphanta van bomji pusi ningje. Kehai aterank atumke Diphu Morning Star atum along pathu dunlongpo puta CEM ningje.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives