ADVERTISEMENT

This area is available for advertisement. Please contact for details.

Arnivang
Get Adobe Flash player

Amri constituency ta Paipai 25 pen Airtel network longlo

Diphu, Chiti 15: Ratpangri keklem aphuthak rat atum kaike kachini dun thekji aphan pu akemang pen India ratpangri Digital India selam lo. Laso ateng online sai keklemji aphan pusi India atok-ano along internet service pi lo.
Digital India kapachunji aphan son thom ason kenangsot, kejokvan kachingthur lapen kithirklong digital ahormu do nangji, ratpangri asai digital pensi pi nangpo lapen kado kave aphan digital aphuthak pachini nangji.
India adang Digital India inpusi rong atok-ano anta keprapjin internet network lapen digital aphuthak mesen pen pachini nangji. Laso ateng kedamtang ningkan 3 aprang 2015 aningkan Jakhong isi arni India prime minister Narendra Modi Digital India ingpu lo.
Digital technology arnivang ta ke-en aphai bat bom lo. Hormu kecham kejor akulat pen chenglok ratpangri asaihem along anta en bom lo. Internet pen ajok ilitum aphan isivet alongklam along nang van lo. Kaprek-kaprek aphuthak birta chepachoi longlo anparta kaprek-kaprek aphuthak ining arlo alam chethan dun long lo.
Lason ahut Amri Helping Hands Society atum chepaduksi Amri pen Chinthong constituency arat atum mesen telecommunication network kelongji aphan keklem chepaduk lo. Laso ateng pini rat atum amahang along ning karong lapen ratpangri atum kacherap dun apot kachoro alam angho pen arju longlo. Laso ahin la-an sose kachingthur theklongpo puta netum ning chepathe lo.
Amri pen Chinthong ahavar Bharati Airtel 4G ke-en long ke HAD minister Sum Ronghang nang kacherap lapen nang kachepaduk ale lo. Laso atengsi hini a constituency arat atum kedamtang Chiti 6 arni pen Airtel 4G network en long lo. Umswai along masapso network siksak chet tahai seta kaprek-kaprek adim along anke mesen a network longlo.
Havar arat apharman Amri Helping Hand ameiphi Binolin Phangchopi, klembangphu Sarkiri Bey, Hunmily Hansepi atum laso aphuthak kedamtang Chiti 13, 2018 arni HAD minister Sum Ronghang aphan archo dam lo. Amri pen Chinthong arat do-anta alangli kacherap dun kethepik apot ning arongsi kachoro pajir lo.
BSNL tower kesom asai non malom klem bom lo, lasi BSNL asai ta prapjin pen tang lote la-an sose akejoi dopo puta constituency hini arat atum ning chepathe lo. Pinpurme, Amri Development Block angkang kado kave bang 42,102 sose armu do.
Karbi Anglong Autonomous Council a CEM Tuliram Ronghang lapen Assam PWD, Health and Finance minister Dr. Himanta Biswa Sharma atumta kacherap dun apot havar arat atum pen kachoro pajir. La-an chot kali Amri a MAC Dominic Uphing Maslai ta kachekroi dun apot netum choro lo pusi Amri Helping Hands Society atum birta nang pale.
La-an chot kali Aruel Rongphar pen Bijoy Phangcho atum ta nang kacherap dun apot alanglitum aphan netum chematha lo pusi Amri Helping Hands Society ameiphi Binolin Phangchopi birta nang pale.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives