ADVERTISEMENT

This area is available for advertisement. Please contact for details.

Arnivang
Get Adobe Flash player

Serdihun Girls pen Waisong Boys hostel chingrumpet Fresher’s Social meet kapaman

imageDiphu, Chiti 14: Karbi Anglong arlo anong kachethang klong Diphu Government College a hostel Serdihun Girls hostel pen Waisong Boys hostel atum chelangpet pini akimi atum aphan kedeng Fresher’s Social Meet kapaman.
Fresher Social Meet kecheng ahut charli osomar atum pen kedeng alun parju, laso aphi Serdihun Gilrs Hostel a monitress Mili Teronpi kedeng alamthe jai lo. Laso along assistant monitress Merina Hansepi penta mai along abarim hostel kaboha apharman lamthe jai.
Assam University Diphu Campus member secretary Thekar chapbang Longsing Teron arideng pen wall magazine ingpu lapen kedamtang Chiti 9 arni kaprek kaprek kapathu along kehai atum aphan nong-eh pajir.
Mai along prekjek alohi aman pen kachetong dun Dibrugarh University executive council member bangphu lapen lapen Assam University Diphu Campus member secretary Thekar chapbang Longsing Teron mai along chetong dunsi hostel kedo bom charli osomar atum aphan loh kacharli akenangsot aphuthak than-pare.
College kilut pen lote charli osomar atum kopi ahinsi kilut dunjima kecheng lo, non akai ke aprang ason satlang unlote choklo pu akai kalilo. Lasi kaprek-kaprek kachepate asatlang along ketok pen kachepa-un dunji aphan mesen aphant (percentage) chepalong nangji lapen kachepate asatlang chepa-un dunsi kaprek-kaprek achokamar chepalong dun nangji.
ST quota, Council a chokamar heihui aphan chotong ding chot pulote thangta long dunde lo, lasi APSC pen chenglok UPSC anparta kaprek-kaprek kachepate asatlang tok dun pen chepa-unsi chokamar chepalong nang po puta Thekar chapbang Longsing Teron charli osomar atum aphan than.
La-an chot kali, lahai asatlang ketok dunji mate chokamar kachepalongji aphan D.El.Ed, B.Ed lason thakthak kaprek-kaprek a course ta endun nangji puta mai along Longsing Teron jai.
Alangli charli osomar atum pen katalon fresher’s social meet along khei longri kachinghon nangji alemthe jaisi hemprek apharman osomar atum aphan than pachini tekang.
Mai along kachetong SPKL a sankur chunbang Johny Timung SKPL (Society for promotion of Karbi language) keklem-kedam aphuthaksi mai along than. Karbi Anglong arlo kedo school along an IX pen X angdeng anta Karbi subject MIL kepaponji aphan keklem lapen university angdeng along Karbi Language Certificate Course heihui aphuthakta alangli jai.
Mai along kachetong KSA dun meiphu Mirjeng Kro, KSA ameiphu Semion Rongphar, HSDC meiphu Dr. Mongve Rongpi atum pen charli osomar atum aphan kacharli aphuthak aning kapathe alamthe jai tekang.
Mai along DGC principal Dr. Nirab Kr. Sharma, Prof. Machuria Hussain, Maggie Katharpi, Everester Khorsing Terang, KSYC sankur chunbang Bipul Tisso lapen kaprek-kaprek man kedo abangphu-phi atum chetong dun.
Arnikangsam apor hostel hini chingrumpet lunkan amalin pamansi nong kachethang lunsepo Mongal Singnar (RokRak) atum aphan phasi kilun-kekan pen ning arong chipi rinti lo.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives