ADVERTISEMENT

This area is available for advertisement. Please contact for details.

Arnivang
Get Adobe Flash player

Hemtun 100 arat aphan ningkangsam pen ratsai klembang Tingkreng Rongpi kerap pajir dam

Diphu, Chiti 14: Nonhetjong Borlangpher ahavar arve kethe ajok men-men Borlangpher alangroi alang kangbak. Men-men kangbak ajok laso alangroi akung kedo ahemtun lapen sai chotiki adim anta nahok lo. Lang kethe pen kisung alam ratsai klembang Tingkreng Rongpi arju longsi pini adim an pale dam. Lang kanglum pen kisung kepho lapen keboidet ahemtun 100 aphan ningkangsam pen sang lapen chitim alan keron pachetang dam. Keron amai along Lumbajong VDC chairman Lawrence Ronghang lapen alangli sangho atum chetong dun.
Keron amai along Tingkreng Rongpi kejai ke, Borlangpher alangroi akung kedo asanchom ahemtun lang kethe ajok inglum et lo lapen inut amonit apran damjui lo arju longsi pini asapsovet seta neli jongjung ningkangsam nang pajir lo. Athema neli nang kerap un-oji ajakong ave seta kisung lote maduta isivet lo lasi asapsovet ta nang ron lo. Alangli kejai thuke, District Disaster Management pen kaike chepatebok bom nangji athema lang kethe alam chepu thekthe. Lasi men-men kisung ahut alangtum aphan phasi nang kapajok dunji aphan birta pachini nangji. Apran kedamjui ahem asor atum aphan akerap kapajirji aphan ratpangri sai deng bom lo lapen kanahok dun ahemtun do-an aphan mondal atum vangsi nang servey po.
Laso ahut nanglitum chethan dun nangpo lapen akerap seta long dun po. Iltum hem chikim setame langroi akung, akangdai atalom chikim ponpe det nangji. Athe, barla lang kethe-lang pleng apor ahut ke langroi alang akangdai atalom si liji. Bangso ajok ilitum hem lang inglum si hem ahormu doan ilitum nahok nangpo. Hem kachikim setame akangtui ajo asonsi chikim nangji. Pini neli nanglitum aphan kerap kepajir long setame neli kopai keme pen ajok si nanglitum aphan masapsovet ta pipajir longlo. Nanglitum pen kachetong long lapen kacherap long lake ilitum aphan Arnam si kapachetong pusi hok vek nangpo. Kisung kepho lapen keboidet arat atum aphan kerap kapajir long asonthot ning kachingsam ave. Lasi, pini nanglitum aphan kachoningri ke, ilitum monit hijan kacherap lapen bidi sore kachipi akenangsot pupen chenglok Borlangpher ahavar arat kisung keboi doan aputhak seta neliphan ta pachini pulote neli sorkar ahin pen kerap kelongji aphan nanglitum apharman chingki chingvai dun longpo pusi than pare.

Leave a Reply

Your email address will not be published. Required fields are marked *

September 2018
M T W T F S S
« Aug    
 12
3456789
10111213141516
17181920212223
24252627282930
Archives