ADVERTISEMENT

This area is available for advertisement. Please contact for details.

Arnivang
Get Adobe Flash player

Bithung Rengthama constituency angkang long 7 PMGSY along-eh kesom

Ningkan isi patanglap nangji pusi contractor aphan CEM Ronghang kapinkhat

Jengkha-Kheroni, Chiti 14: Karbi Anglong pen West Karbi Anglong alongri angkang atok-ano arong araje kelarji aphan kachingthur asai pini Karbi Anglong Autonomous Council a Chief Executive Member Tuliram Ronghang arideng pen long-eh kesom.
West Karbi Anglong alongri Karbi Anglong Autonomous Council kaparlo Bithung Rengthama constituency long troksi PMGSY asai keklem kapangchengji aphan pini CEM Ronghang arideng pen long-eh kesom. Jaimek ateng kechengsi MoS mate KAATC atelup pen PMGSY atovarpi kaselamji aphan Kolonga pen Sildubi kacheleng km 10 ajak kiding pacca atovar kaselamji aphan sika crore 3.25 atangka panong lo. Laso aphi Donkamukam (Artukekang krong pli kachetok) pen Phangtengprang PMGSY atovar an M&BT 2017-18 dihin aningkan apharman km 4 ajak kiding kaselamji aphan long-eh som. Adunthu Baithalangso PWD (R) Division kaparlo Sitolijan pen Womu atar an km 3.360 ajak kiding PMGSY scheme. Lasonsi kaprek adim alongta MoS scheme PMGSY kacheleng kemesenji aphan PWD atovar mate langbung dongvok dongplak longle detji PWD atovar kemesenji aphan pura KAAC, CEM Tuliram Ronghang arideng long-eh som. Along-along long-eh kesom asai jutdet aphi PMAY-G ahem kikim ketang adim CEM Ronghang arideng pen pangpu lapen Nam Taradubi mai hongjai along Taradubi avaikang arat aphan akejoi pen chitim alan keron amaipi pangni. Lason thak thaksi Tumpreng mai hongjai alongta chitim alan keron amai pangni. Labangso amai along Tarjan Langthasa chepahemphu amai along local MAC mate KAAC CEM Tuliram Ronghang alohi sarpo aman pen chetong dun, anparta CEM achor Kache Teronpi, WKAD Yuva Marcha meiphu Purna Ronghang, Bithung Rengthama constituency VDC chairman Ramson Rongpi atum alohi aman pen chetong dun.
Kaprek-kaprek adim kachingthur asai lapen kadure arat aphan chitim abengka keron ason thak thaksi Artu kekang, Rongkhang Garo arong mai hongjai alongta akejoi pen chitim abengka keron mai pangni.
Kachingthur asaimo kedeng adim an MoS pen kapadeng PMGSY PWD kacheleng atovarpi kaselam ningkan isi angbong patanglap nangji lapen “parivarton” ratpangri atengsi non rong-rup atok-ano kedo rat kacheleng kisung pen kapajok asai deng bom lo pusi CEM Tuliram Ronghang jai. Alangli kejai thuke, Rongkhang kerai anampi arlo kedo atum aphan longle patta kapalongji aphan kabor-i ingtonte lapen komane ratchari asong atum laheihui kenangsot asaimo klemkle, alangtum keklem ke kachesorsa asaisi thek chot lapen rat aphan akisung along rap dunde.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives