ADVERTISEMENT

This area is available for advertisement. Please contact for details.

Arnivang
Get Adobe Flash player

West Karbi Anglong Bormarjong along ‘Clean & Green Village Mission’ kangpu

imageBORGAON, Chiti 13: Environment and Forest saikam Brand Ambasedor Chandrakanta Basumutary West Karbi Anglong district nang humrisi ‘Clean and Green Village Mission’ pini Bormarjong along ingpu tekang.
India arlo Assam aphan isi kangthirnai state kapamanji aphan pu akemang pen ongdung a district pen kado kave rong 33 along laso a mission deng lo. Kado kave rong 33 angbong West Karbi Anglong kedo Bormarjong ta isi lo.
MyGov Assam kapatirpi along PHE, district administration lapen Sports & Youth Affairs saikam atum cheto dunsi Bormarjong along pini laso ajaimek pachun lo. Pini amai along MyGovt ASSAM pen Dipankar Saikia, Himalay Sarma lapen Dhiraj Deka, Baithalangso LA a MLA Dr. Mansing Rongpi, KAAC EM Propdip Diphusa, Amri a MAC D. Uphing Maslai lapen OSD, KAAC, Hamren anparta ADC Hamren Anil Chandra Das atum chetong dun.
Mai along Chandrakanta Basumutary kejai ke, ingnam lapen lang-temon (Environment) keraikomji aphan anuttinta arpu che-en nangji pusi choningri. “Monit atum laso apirthe along kereng bomji aphan plastic kejokvan apirthe,” puta alangli jai.
Dr. Mansing Rongpi kejai ke, ‘kachepangthir ke kaike ta arnam adun lo’ lasi West Karbi Anglong arlo arongtin lapen ahem ahumtin atumta kachepangthir etji aphan arpu che-en nangji puta alangli jai. Kado kave ta ‘Clean and Green Village Mission’ along cheto dunsi West Karbi Anglong aphan India angbong kangthirnai a district paman nangpo puta alangli choningri.
Laso Mission apharman kado kave rong 33 angbong pen Bormarjong aphanta kangvai pon apot Amri arat apharman bangphu D. Uphing Maslai Amri pen Assam ratpangri kejalin CEM Sarbananda Sonowal lapen Karbi Anglong Autonomous Council kejalin CEM Tuliram Ronghang atum aphan choro.
West Karbi Anglong district Amri constituency along kedo Bormarjong ke isi Tiwa arong lo lapen laso arong along ahemtun tin ta arlosomar atumsi hem chejalin lo.
Laso arong aphan arnam ahirjume kethepik ajok kelang alon dopik lapen inglong kilir seng kekom chen ajoine kelang ining ingsamjin anpin. Laso constituency aphan arnam ahirjume kethepik ajoine isi kijui kelang adim asonsi man lo. Lasi kado kave atum laso ajaimek along cheto dunsi kachepangthir abirta pachethang nangpo pusi constituency MAC Maslai choningri.
Kejoi kelang atum kappa-ongji aphan NGO atum penta kapachethang asai keklem bom aphuthak ta alangli kachoro pajir. La-an chot kali Bormarjang ke Assam state angbong kangthir nai arong Shikdamakha pen chetebokhet lo puta than.
MyGovt Assam atum rong arat atum pen chihut-cheput pen kelong alam do-an Assam chief minister along pale po puta than. Laso amai along thengpi aklim ke-eh lapen kapathu ahormu heihui ingnam raikom lapen Sports & Youth Affairs asaikam pen pini rong arat atum aphan ron dun lo. Laso ajaimek along ongdung rong arat atum cheto dunsi chief minister’s kaheman ‘Clean and Green Village’ pachunpo pusi chechak rinti lo.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug    
 12
3456789
10111213141516
17181920212223
24252627282930
Archives