ADVERTISEMENT

This area is available for advertisement. Please contact for details.

Arnivang
Get Adobe Flash player

SSIC ingdeng hini mahang kethek arni katalon

imageDiphu, Chiti 13: Chiti 12 Thelang arni Sixth Schedule Implementation Committee (SSIC) atum Diphu Lorulangso Rangsina Sarpo Cultural Hall along ingdeng 2 mahang kethek arni katalon.
Katalon amai along Karbi Lammet Amei ameiphu Suren Kramsa, SSIC bidisar JI Kathar IAS (Rtd), Hills Tribal League (HTL) a convenor Saising Rongpi, Dima Hasao pen Sanjeevan Langthasa, Lakhijan Baptist Church a pastor Aaron Teron, United Karbi Students’ Association (UKSA) ameiphu Ratan Terang, 24+ asong a convenor Angtong Ingti Kathar lapen Karbi Anglong Social Development Organisation (KASDO) ameiphu Rakesh Ronghang atum chetong dun.
Katalon asaimo ateng adap porphai 9:30 apor SSIC ameiphu Semson Teron song alama pachepur lo. Laso aphijong meiphu Semson Teron chepahemphusi porphai 10 pen rat amaipi pangcheng lo. Mai along SSIC chunbang Pranjal Kro aloha atum aphan kedeng. SSIC jutang chunbang lapen inut anong kachethang klong lunsepo Christin Teron lun parjusi mai along kachetong atum aphan aning parong lo. Mai along Diphu Government College Serdihun Girls’ Hostel, Rasinja Girls Hostel lapen Waisong Boys’ Hostel along kedo DGC charli osomar atum pen chenglok kaprek-kaprek ahin pen kevang a okkarjang (Youth) atum mai along chetong dun.
Mai along SSIC abidisar JI Kathar SSIC akenangsot lapen Sixth Schedule akenangsot aphuthak penang an alangli than. La-an chot kali Sixth Schedule ketok ahut constituent assembly along kachingki-chethan alam aphuthak alangli than. Ove kimi inglong aso a okkarjang atum karjapthip pen sixth schedule kapangtangji aphuthak ta alangli pachini.
HTL convenor  Saising Rongpi SSIC atum keklem-kedam aphuthak kero pi tekang. La-an chot kali Karbi lapen khei barim apharman keklem-kedam along un-an pen HTL atum kacherap dunji aphan chechak tekang.
Mai along kachetong dun alohi sarpo KLA ameiphu Suren Kramsa KLA asong pen non malom keklem kedam bom aphuthak mai along than. Laso ahut alangli kethan ke university angdeng pen chenglok school angdeng along Karbi alam MIL kapaponji aphan klembom lo’. Jongsi laso keklem asai chun pen deng det pulote isi phurkimo asonsi manpo. Karbi atum aphan Mikir, arleng puta pangthek lasi adim tin along langsi ilitum laso apotta deng nang kok po puta alangli jai.
SSIC ameiphu Semson Teron kejai ke, lahai arpu non ove kimi atum deng dun bomsi kevangji akai la-an sose Karbi akhei aphan aprang keponji asai klem nangpo’.
Mai pachekakke aprang SSIC rap chunbang Longkumar Bey mai along kachetong dun alohi lapen kaprek-kaprek ahin pen kevang SSIC asongja atum aphan kachoro pajirsi mai ingsamjin pen pachekak lo.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug    
 12
3456789
10111213141516
17181920212223
24252627282930
Archives