ADVERTISEMENT

This area is available for advertisement. Please contact for details.

Arnivang
Get Adobe Flash player

Rafale scam sika kuti 41,205 atangka kapanglim pen chenglok BJP atum kachobai alamchak pen rat aphan kachongthui: Sarthe Kramsa

HAMREN, Chiti 13: West Karbi Anglong District Congress Committee (WKADCC) kapatirpi pini West Karbi Anglong district ahempi Hamren rongsopi Socheng Mondal Congress Committee asaihem pen armu chejengsi West Karbi Anglong a DC asaihem athengno an pale.
Dharna kangni along Bhatratiya Janata Party (BJP) kachari aratpangri kechokche alamthe chethansi pinrem lo.
Pinpurme UPA-Congress aratpangri ahut sika crore 526.10, bonsetame non NDA-BJP ratpangri kevang pen sika crore 1670.70 Rafale aircraft hum-36 kenam along rat atangka sika 41,205 akuti kapanahok aphuthak WKADCC ameiphu Sarthe Kramsa jai.
BJP ratpangri jakong vanglote kachopanglim atangka (black money) kadure det arat aphan bank account along sika lakh-15 kethapji alamchak pen kachongthui, chokamar anghoi kuti hini kipiji kachobai, kenangsot kecho ahormu pen kechenglok asontinta ador keso pen kenam nang. Petrol, diesel ador keso pen rat kachemin nang, atok-ano atovar iksip mesen atovar kachehelat longle pen rat atum kopisi aning chethe dam athai doji ma pusi WKADCC dun meiphu Borsing Bongrung jai.
WKADYCC ameiphu Augustin Inghi kejai ke, BJP kachari aratpangri jongsi ache din lapen parivartan vanji pu alamchak chepapleng asonte pini arni tovar kaheno, tangka kadure, chokomar anghoi kelong dunde, kachopanglim aphuthak West Karbi Anglong deputy commissioner asaihem athengno nang chingrum jok plot apotlo’.
BJP aratpangri akechokche alamthe anuttin ta ning arlo chethapsi kevangji Member of Parliament (MP) kilik ahut democratic aron ateng pen BJP kaparemji aphan ador keso a vote pipedet nangpo pusi WKADCC administration sankur chunbang Honsing Inghi jai.
WKADCC pen kechenglok WKADYCC, Mahila, Block Mondal, Sevadal atum cheto dunsi dharna ingni dun pen ardi padodun lo. Laso ahut India President Ram Nath Kovin aphan kapanong a pinpur aloh West Karbi Anglong a ADC arideng pajir dam.
WKADCC ameiphu Sarthe Kramsa, dun meiphu bang hini Wilson Teron pen Rupsing Bongrung, administration ahin sankur chunbang Honsing Inghi, sikdang chunbang Sonjit Marak, WKADYCC ameiphu Augustin Inghi, WKADYCC dun meiphu Krishna Timung lapen ongdung Mahila atum cheto dun.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives