ADVERTISEMENT

This area is available for advertisement. Please contact for details.

Arnivang
Get Adobe Flash player

Erikson India company ladak amonit aphan varsai kipipe aphuthak AYM kachesong

GUWAHATI, Chiti 13: Sai keklem-kedam ahin boche barim ladak kedovek amonit atum aphan kapachorai lapen aduk kanghoi aphuthak anparta phant 100 ladak amonit atum aphan parlo pon nangji pu hangsi Erikson India Private Limited pu isi Telecommunication Company Dispur asaihem along Asomiya Yuva Manch atum kachesong. Asomiya kachongdat abangphu-bangphi atum aphan kapasung ington nangji, angtan asor atum ladak nangcheparoka longle, angton pen kaparlo ponji asai along pachethang (Advertised) pi nangji pusi kachesong ahut hang. AYM asongja Jitul Deka pachetak aloh pen kapangdak ke Erikson India company atum kedamtang penang an arni pen ladak amonit aphan hotur asai nangklembom angthek Yuva Manch atum longlo. Bang 225 sose kachongdat atum kedo labangso a company along ladak kachongdat amonit atum aphan alanglitum aduk inghoi lo. Arjikiding klui pen kachongdat dunbom ladak amonit atum aphan akangtui angdeng an keponpe lapen kithirthip asai ajakong pipe. Halapu apun-achak kechoklim ladak amonit atum aphan pekpesi angtan pen kevang atum aphansi pachethang asai klemkle pin pensi pek varetlo pusi Jitul Deka akoi pi. Pachetak aloh along alangli kapangdak thuke, kedamtang Paipai 21 arni AYM pen labangso a company kelangchari atum aphan chetong damsi company along non pangrum pet bang ko-ansi kithirthip lapen kithir thipthe kachongdat atum kedoma aphai hanglo lapen erui an apor pilo setame patheng-pathong pen aphai pipe lapen lapuson a report Assam police akangtui asaiphu pen papi toite pusi company kelang chari atum pachi lapen halabangso arni amatsi company asaihem aduvari along DGP pen danglok ongdung police asaiphu atum amen lapen mobile number ta vek ling lo. Company pen lapuson asai kachomatha ajoksi chesong nangkoklo puta Deka pangdaksi Assam alongle along lahai a company atum ladak amonit atum aphan avarsai kipi ahin ratpangri atum thangnat asai kedengde det ajoinesi kethek-kere mate apun-achak kechoklim atum arum angdengsi chongdat nangbomlo, lasi laso aphuthak ratpangri pen sodak asai deng nangji pusi pachetak aloh pen hang.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives