ADVERTISEMENT

This area is available for advertisement. Please contact for details.

Arnivang
Get Adobe Flash player

Pakhila Ingtipi ser alek kelong dun pen India mate Karbi Anglong aphan arahi parlu dun bomlo

Asian-Pacific Masters Games ni trok kepleng, Hima Das aphan ason Pakhila aphan ko-antong aman kipji lone

imageDIPHU, Chiti 12: Kedamtang Chiti niphai 7 arni pen kapadovoi Malaysia adet Penang pu adim along Asian Pacific Masters Games pini an ni trok plengtanglo. Ni trok angbong kachepate ahut India adet pen penang an abangphu-bangphi atum ser-rup lapen tam alek long dunsi India adet apharman mahang paklar dun bomlo. Laso angbong Assam mate Karbi Anglong pen kachepate dun Pakhila Ingtipi, Rajen Rongpi lapen Sikari Inghi atumta ser-rup lapen tam alek long dunsi India adet pen pen Assam lapen Karbi Anglong aphanta nongme van lo. Chiti 11 arni Sikari Inghi alangli 1500 metre kekat kachingbai along kethom angdeng ledunsitam  (Bronze) alek longdun det aphi puthot pini Pakhila Ingtipi ser alek kelong dun pen ansose India adet mate Assam lapen Karbi Anglong aphan thedung anongnam vanlo. Pakhila Ingtipi alangli arta ningkan 35 pen athak angbong 5000 metre keng kedam kachingbai alongsi kechengsi angdeng ser alek long dunlo. Masters Games Federation a rap chunbang Dhansing Rongpi kejalin Assam mate Karbi Anglong pen kechengsi apharman International kapathu along kachepate dunlong pen chepardun ron ser-rup alek kelong dunke choro lo pusi rat atum ningje. Niphai 15 arni an kapadoji Asian-Pacific Masters Games along India mate Assam, Karbi Anglong pen kachepate dun abangphu-bangphi atum ansose ser rup anong-eh kelong dun pen phurkimo along isi angthek bipo pusi rat atum hirjume pajir. Pini keng pen kedam kachebai along kechengsi angdeng ser alek kelong dun abangphi Pakhila Ingtipi alangli kedamtang Chiti niphai 7 arni kapathu kechengsi arni pensi nong-eh kelong dun abangphilo. Alangli 5000 metre kekat kachingbai along kethom angdeng tam alek longdunsi kapathu arahi parlo ponlo. Laso aphi Rajen Rongpi pen Sikari Inghi atumta arahi arlu dunlo.
Pinpurme Diphu Kakoti Ronghang arong amekar Kehai Ingti Kathar pen Mekri Tissopi atum asopi mate PWD asaikam along AE. Er Sikari Inghi achor Pakhila Ingti Katharpi alangli kedamtang Punjab along kechengsi National Masters Games angdeng along kachepate dun ahut ta kethom ser alek kevan abangphilo. Halaso pensi alangliphan non kapadobom Asian- Pacific Masters Games alongta ingvai ponlo. Alangli ser lapen tam anong-eh kelong dun ajok Asian-Pacific Masters Games alongta ingvai pon nakne detlo. Laso ateng alangli arahi karlubom ke kevangji arni Olympic pen danglok thedung-thedung kapathu angdeng along pathu dun longpo.
Nonhetjong Asian games along kachepate dun Assam abangphi Hima Das ser-rup anong-eh kelong dun pen Assam apharman thedung anongnam vanlo. Laso ajoine India aratpangri lapen Assam aratpangri atum Hima Das aphan thedung aman pisi karne-kangthum lapen ongdung atangka ning kangsam pen pajir lo. Lasi non India adet aphan arahi kaparlu dun bom Pakhila Ingtipi aphanta India ratpangri lapen Assam ratpangri atum ko-antong aman kipji lone lapen ning kangsam pen tangka maha setame ko-antong kapajirji lone ke mo apor ahutsi chini dunpo. Athe Hima Das asonsi Pakhila Ingtipi ta International angdeng along India adet apharman pensi pathu dunpilo lapen thedung aman ta vanpilo.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug    
 12
3456789
10111213141516
17181920212223
24252627282930
Archives