ADVERTISEMENT

This area is available for advertisement. Please contact for details.

Arnivang
Get Adobe Flash player

Howraghat college provincilice keponpe det ajok ni thom aphan loh kethan kapasang

imageThangnat ardi pipe pulote arni hothe loh kethan pasangji puta kether

HOWRAGHAT, Chiti 12: Sarbananda Sonowal kejalin BJP pajirpo aratpangri Education asaikam kapangkre pen kapachobai aphuthak pini pen ni thom an aphan Howraghat college along thanbang atum loh kethan kapasang. Howraghat College aphan jongsi provincilice aphuthak thangnat ardi pipe pulote arni hothe pin aphanta loh kethan pasangji pusi thanbang atum ther. Halapu satlang ta tebok hetlo, laso ajoine kacharli abangphu-bangphi atumta kapamatha kisunglo setame Karbi Anglong district hum troksi non provincilise college along loh kethan kapsang asai deng bomlo. Jong dam me kedamtang Chiti niphai pho arni kangthir-et thanbang arni katalon arnita hum troksi college thanbang atumke Diphu arongsopi along kachesong asai denglo lapen ason-ason kemang aphuthak Karbi Anglong Autonomous Council pen Education asaikam arpu kedo atum aphan pinpur aloh pen pajirlo. Laso aphi anta alanglitum thangnat angthek kachethek longle det ajoksi pini pen loh kethan kapasang asai denglo. Laso aphuthak pini Howraghat College principal pherangke atum athengno kaningje ke 2012 aningkan ahutsi Howraghat College ta government provincilise list along amen klang dunlo setame aphithu amen kangthanpet abangke manghu memelo. Laso aphi 2017 aningkan ahut sixth Schedule ateng pen KAAC parno dunsi isi akaprek aron ateng pen laso a college provincilise unji pusi aprang Education Minister Dr. Himanta Biswa Sarma kaningje dolo setame laso along KAAC kapangkre ajoinesi chington kok lo. Kedamtang ningkan ingkoira pli pen Howraghat College aphan pachobai bomlo. Laso ajoine sai jokjesi pini thanbang atum lapuson asai deng nangkok lo pusi ningje.
Halapu non satlang tan angle bomlo setame lapuson apor ahut loh kethan kapasang asai kedeng ajok kacharli abangphu-bangphi atum sung nanglo.
Saikam arpu kedo atum laso aphuthak jiongsi thangnat ardi pipe pulote kevangji arni arni hothe pin apharman loh kethan pasangji pusi hum troksi college thanbang atum chingkrin.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug    
 12
3456789
10111213141516
17181920212223
24252627282930
Archives