ADVERTISEMENT

This area is available for advertisement. Please contact for details.

Arnivang
Get Adobe Flash player

ASDC Langhin constituency committee keseng amai pangni

Jengkha, Chiti 12: West Karbi Anglong District aphan pini KAAC CEM Tuliram Ronghang arideng kachingthur amo klemsi pini Constituency kethom Hamren, Bithung Rengthama lapen Socheng along kachingthur asai keklemji aphan pusi long-eh kesom.
Kechengsi Harmen constituency angkang PMGSY scheme tovar kaselamji aphan kado kave krongpli atovar kaselamji aphan KAAC CEM pen Tuliram Ronghang long-eh som lo. Lason thak thak Socheng constituency along PMGSY scheme pen tovar kaselamji aphan puta krong ni atovar apharman CEM long-eh som lo.
A constituency tin aphan kapanong Sika crore 10 atangka pen mini Stadium kaselamji aphan pini CEM arideng pen Hamren Constituency apharman Vohamlangso Harchobat
lapen Socheng constituency angkang Habe arong arong along mini stadium kaselamji aphan long-eh som lo. Socheng Constituency along kaselamji a mini stadium aphan Habe Dengja Sports Complex pusi amen irlo pusi KAAC EM mate Socheng Constituency a MAC Rupsing Teron kado kave athengno pangdak.
Pini Hamren lapen Socheng Constituency apharman kaprek kaprek adim along long-eh kesom ahut Hamren constituency kedai Bithung Constituency arlota PMGSY scheme pen tovar kaselamji aphan CEM Tuliram Ronghang long-eh som tekang lo.
La-an chot kali Harlongjuve, Waisong College apaisong lapen kilut  a gate kaselamji, Jirsong High School along pathu aklam kaselam aphanta KAAC CEM pini long-eh som dam.
Hamren ahithi arlo 5th Assam State Finance Commission pen Hamren hithi bang drain, RCC Slap Drain, RCC culvert, Dhaniram Rongpi lapen Semson Sing Ingti akumlin an kapale atovar kaselamji aphan, Dumping ground an kapale atovar, Dumping Ground apaisong, RCC Market Shed, Solar Street Light, Hamren hithi irui ahithi Hamren Habe along rat apharman kachiti ahem kikimji pu pen chenglok ongdung kachingthurji aphan pusi CEM Tuliram Ronghang arideng pen long-eh som lo.
Amlong alangroi adolong along RCC adolong kedonji aphanta CEM lamthe pi tekang. Laso aphan sika crore 15 panong puta alangli paklang.
Socheng Constituency angkang Habe arong along Sika Crore 10 pen mini stadium kaselamji aphan along-eh som det aphi rat amaipi pangni.
Hamren MAC EM Rupsing Teron kachepahemphu amai along constituency a BJP ajabang Headsing Rongphar pensi aloha kapachini lapen mai kepha alamthe jai. Mai along KAAC CEM Tuliram Ronghang aloha sarpo aman pen chetong dun.  Mai along KAAC Chairman Longki Timung, MAC Mongal Sing Timung, MAC Dorsing Ronghang, MAC Richard Tokbi, MAC Reena Terangpi, MAC Prabhat Chandra Taro lapen BJP West Karbi Anglong District Committee a meiphu Arun Terang atum pen chenglok kaprek kaprek man kedo atum chetong dun.
Hemprek pen chenglok, kachingthur asai keklemji, ove kimi aphan voreng kipiji lapen Karbi Anglong arlo kachelar kevanji aphan pusi netum BJP along chingrum dun lo. Laso ateng pensi pini arni an nelitum sai klem lo. Team Karbi Anglong atum pen sai keklem angthek rat atum theklong prong lo, lasi kevangji arnita la-an sose sai keklem thekji aphan nanglitum nang cherap dun bom nangji pusi CEM Tuliram Ronghang mai along jai.
Dr. Jayanta Rongpi aphan Karbi Anglong arat atum cherap dunsi MAC, EM, CEM, MLA lapen MP anta paman lo. Seta alangli rat aphan chetengne det ajoine rat akisung alam thangte chinine, la-an chot kali rat atum alangli phan aning hang aling chetong dam longle. BJP kachari KAAC mate team Karbi Anglong atum ke lason kali netum kaike ta nangtum alongsi do lapen doverji, athe kado kave aphan pangrumpetsi team Karbi Anglong paman lo puta CEM Tuliram Ronghang mai along jai lo.
Laso aphi EM Rupsing Teron pen maiphu alamthe lapen kachoro alamthe pajirsi mai pachekak lo.

Leave a Reply

Your email address will not be published. Required fields are marked *

BREAKING NEWS
September 2018
M T W T F S S
« Aug    
 12
3456789
10111213141516
17181920212223
24252627282930
Archives