ADVERTISEMENT

This area is available for advertisement. Please contact for details.

Arnivang
Get Adobe Flash player

KSF pen Cachar District along kedo a Karbi atum pen chingki chethan amai kangni

Diphu, Chiti 11: Karbi Students Federation (KSF) atum patirpisi kedamtang Chiti 9 arni Cachar District New Malidor Bengali Medium LP School along Chingki chethan amai pangni.
Malidor along kedo a okkarjang atum pen KSF ajabang atum aphan deng lo, laso aphi KSF sankur chunbang Bikram Hanse chepahemphusi mai ingni lo.
Mai along KCS dun meiphu Humsing Bey, KLA sankur chunbang Kamsing Hanse, All Assam Tribal Sangha a chunbang Dhiren Ingti, Blingsong Durong, Brinyton Ronghang, Esterson Tisso, atum pen chenglok kaprek kaprek manpeng kedo abangphu atum mai along chetong dun.
Mai along kado kave bang 100 sose rong arat lapen charli osomar atum chetong dun. Barrak Valley ahavar along kado kave rong 18 Karbi arong do. Lahai a Karbi atum atum amethang alam, jutang lapen porom punthi pensi chepangthek lo, Barak Valley a Karbi atum ratpangri pen kipi avarsai kelongdun jumhet khangjang pusi haladak kedo arat atum mai chethan.
Kevangji aove atum methang akhei ajutang alam la-an sose kachini thekji aphan pusi ‘KSF’ atum pen Mini Book Bank ingpu tekang lapen ajahak ador kedo kemesen aloh pharchap ta pi tekang lo. KCS, KLA, lapen indigenous forum atum penta loh pharchap (kitap) kipi dun apot KSF pen kachoro pajir.
Mai along ongdung aphuthak chingki chethan lapen Noth East angkang kaphuri pachetang det aphi Karbi Anglong Declaration (KAD) arni aphuthak cherai lo. Chiti achiklo kijutsi arui malom Nagaland lapen Manipur a state alongta humri damsi haladak kedo Karbi atum pen chingki chethan amai pangni damji puta mai along cherai lo pusi birta long dun.

Leave a Reply

Your email address will not be published. Required fields are marked *

September 2018
M T W T F S S
« Aug   Oct »
 12
3456789
10111213141516
17181920212223
24252627282930
Archives