ADVERTISEMENT

This area is available for advertisement. Please contact for details.

Arnivang
Get Adobe Flash player

Angtan a Muslim atum Assam nongno kevanji aphan ajakong kelonglok aron kopilo: HTL, KSYC, KSA, KNA, KSO, DSA

DIPHU, Paipai 29: Assam along 1971 voter list ateng pen kaselambom NRC along aronre pen angtan Muslim atum amen thaplo. Laso pen langdam pulote laso a NRC Assam boche barim atum aphan isi kisung atovar ahin kangdoi mate ajakong pabopo anparta angtan asor aphansi ladak amonit pinching detpo pusi pini KSA asaihem along Hills Tribal Legue, Karbi Student & Youth Council (KSYC) Karbi Student Association (KSA), Kuki National Assembly (KNA), Kuki Student Organisation (KSO) lapen Dimasa Student Union (DSU) atum chelangpet pherangke amai kangni ahut jabang atum ningje. Alanglitum kaningje atengke, kedamtang arni aronre angtan Bengali Muslim atum Assam NRC along alanglitum amen kachethap ajok ratpangri pen song atum chekroi dundesi Muslim atum aphan jakong kapabopji aphan kabor-i pusi “Awaz” pu isi a web portal atum pachethanglo. La anchot ta kali aronre Hindu Bengali kaprek-kaprek ahamphang asong atumta alanglitum amen NRC pen kangthanji aphan sai klembomlo pusi alam klangbomlo. Muslim angtan ajakong atum kaprek-kaprek adet Muslim atum akerap cho-en bomlo lapen United Nation Organization (UNO) secretary aphanta kido toklo. Lasi lapuson keklem ajakong alanglitum komat pensi kelonglo puta alanglitum ningjesi laso along jongsi lang tarlip dun pameka pen cherai thekthe pulote boche barim atum virdetji.
Isi kamuthi dam meme alam abangke kedamtang 1951 aningkan pen 1971 aningkan angbong halaso ahut East Pakistan mate non Bangladesh pen nangkebe Hindu Bengali Muslim angtan asor atum aphan India ratpangri atum Refugee pu hoksi angthek aloh (document) pajir pen kedo pathakji aphan avarsai pilo. Halapu angtan Muslim atum joike pen Begali Muslim kepangthek atalom along dobomlo. Assal along kaselambom NRC along aronre angtan Hindu atum amen kethapji aphan AASU pen AGP atum angtan Hindu Refugee atum a document aphanta NRC along amen kethapji along ke-enji aphan ratpangri pen kachekroi dolo pusi alanglitum ningje. Assam Sanmilit Mahasangha working president Motiur Rohman HTL convener Khorsing Teron, Saising Rongpi, KSA ameiphu Bijoy Be pen danglok kacherap dun inglong aso hamphang asong jabang atum kaningje thuke, Indian Constitution along Refugee aphan Indian Citizenship kipiji aphan thang avarsai ave mate refugee aphan thangnat aron kehot ave. Pinpurme Assam Sanmilit Mahasangha working president Matiur Rohman alangli 2017 aningkan Aru niphai 18 arni RTI pen India government home ministry aphan  Refugee aphuthak kopine aron kehot ason doma pusi karju dolo. Laso aphuthak home ministry chief secretary Robi Sundobe ahin pen 2017 aningkan Vosik 15 arni No.25022/12/2017 (RTI)-F-IV report kipi ateng pulote Refugee aphuthak India along ajat aronta ave pusi pachinilo. Lasi lapuson ahut Hindu adhorom aronre angtan asor atum amen NRC along kethap ponbom asaike aronre mate constitution aron ateng kalidet lo.
Assam along Hindu angtan asor atum aphan kanghon chepaklangsi ratpangri atum pen AASU-AGP kacherap dun ajoine Assam along aronre pen kedo angtan Muslim atum ning kangsamse chepaklanglo. Laso ajoinesi angtan adet akerap cho-ensi UNO along pasik damsi Assam along khei aratchari klembomlo mate Muslim aphuthak bidi kanglim klembomlo pusi kapachethang ajakong longlok lo. Assam along suri aningkan pen kedo kethak rappet aphurkimo aphan ning pahonduk lo lasi Assam along kedo-an boche barim atum Assam Sanmilit Mahasangha along cherap dunsi 1951 aningkan apot abang ripdunsi Assam keraikomji aphan alanglitum pherangke amai along jai. Assam along aronre angtang asor alam pen aketer khei aratchari kanghapji aphan Assam Sanmilit Mahasangha atum kedamtang ningka 70 pen arjapsi Supreme Court along lamhoi pli klembomlo. Justice ahin pen detpi constitution rule &regulation ateng pen laso akisung kithirthip aphan pajokpo. Kado kave boche barim atum lapuson aketer khei aratchari kanghapji aphan chepaduk krup pen arjap thip nangpo kali pulote suri aningkan boche rappet aphurkimo chipri dakpo lapen ekai arjon apharman kisung chechak nangpo pusi alanglitum pherangke amai along jai.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives