ADVERTISEMENT

This area is available for advertisement. Please contact for details.

Arnivang
Get Adobe Flash player

Alongtin NSK along phant 10 kachoningri aloh kejok puthot kelang katarlip thuji aphan SC kapinkhat

GUWAHATI, Paipai 28: NRC aphuthak WP(C) No. 274/2009 alamhoi aphuthak pini Supreme Court aman kedo justice Ranjan Gogoi pen Rohinton Phali atum kapangni double bench hearing ingni. Nonhetjong kapangdak NRC final draft list along amen kedo atum angbong pen simple survey ateng pen alongtin NSK along phant 10 atum kachoningri aloh puthot kelang katarlip (Re verification) aphan state coordinator Pratik Hazela aphan pinkhat lo. Ko-an arni pensi ko-an arni an puthot kelang tarlip asai kedengjima mate bang ko-an asaiphu atum aphan kaparlo ponjima laso aphuthak kevangji Chiti 4 arni Pratik Hazela Supreme Court along report pajir dam nangpo.
Halapu tiri ratpangri atum kedamtang Paipai 16 arni aman kedo Supreme Court along kapajir objection pen correction aphuthak SOP pen modality aphuthak kaprek-kaprek asong atum pen alamthe mate bidi-sore ke-en ahut AAMSU pen Moulana Syed Arsad Madani jabang Jamiyat Ulama Sinde penta methang alamthe lapen bidi-sore affidavit kedamtang Paipai 25 arni pajirlo. Pini hearing kangni along SOP aphuthak angton pen alam chingvaive detsi kevangji hearing kangni ahut kado-kave ahin pen alamthe ensi SOP final paklang po pusi Supreme Court pangdak. Legacy data kechokche atum aphan puthot akaprek legacy data pajir pen kachoningri avarsai piji ma pipema lapen lapuson klem lote Family Tree akimi klempi nangkok tahai mate kopi pi avarsai-akisung dojima laso aphuthak central government advocate mate attorney general KK Venugopal alamthe ke-en ahut  attorney general pen klardak alamthe kipi thekthe det ajoine state coordinator Pratik Hazela pen ratpangri angbong chingvaisi Chiti 4 arni aprang report kipiji aphansi Supreme Court  tiri ratpangri aphan pinkhat.
Pini hearing kangni ahut AAMSU pen Moulana Syed Arsad Madani jalinbang Jamiat pen senior advocate Kapil Sibbal, Salman Khursid, advocate Phujail Ahmed Airubi, Mustafa Khaddam Hussain, Nijam Prasa, Abdus Samad Ahmed, Ibad Mustak, Tehsina Akhtar atum lamthe ningje dun pusi AAMSU bidisar Azizur Rahman birta pangdak. Alangli pachetak aloh pen kapangdak thuke pini hearing kangni ahut Supreme Court pen kapinkhat alam do-an aphuthak AAMSU, Moulana Syedd Arsad Madani kejalin Jamiyat Assam state committee pen kurvangthu pajir lo lapen NRC aphuthak madu abe dunde pen isivet akrong pensi mate kangthimlim pen kelangji aphansi chonigrilo puta pangdak. Kedamtang 1971 aningkan There 25 aphi kevang aronre angtan asor atum amen NRC along kethapthe detji aphan kelang pangching nangji puta hangsi madu adai keva atum aphan NRC along amen kethap kethapthe alam pen maduta thangbakbe aduk kanghoi longle detji aphansi arpu kedo atum aphan choningri.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives