ADVERTISEMENT

This area is available for advertisement. Please contact for details.

Arnivang
Get Adobe Flash player

E-ok pen bang a-ok chepa-ok pen kisung

Harsing Taro, Diphu:
Akesar-sar kachethan alamsi Sarlamthe kepu. Sar alam ke lamdak kachekok ke la thak thak. Ahok akesar atum kapalamthe alam ke chekok vek.
E ok pen bang a ok Sarlamthe kaparap dam koson lo? E ok pen methang bang arjon e ri,e keng, e mek, e no, pen danglok e bang arjon aphan e ok pulo.  Bang a ok puke ingsu ar-hang aphansi kipulo. E ok pen bang a ok chepa ok puke ingsu-arhang amek kacheparam aphan lo. Kam keklem ahut natne pen ebang arjon nahok tame ingsu nangke vur, angsu bihek, chehek hedet e ok param thek mate pa ok det. Kebihek angsu pa-ok ke pa-ok det lo. Pa-ok det sita ok prekjam apot si mo arnisi-le arnisi laso angsu e ok me ih eh det sung i-krung ta thek. Ingsu pen ajok ingthum  mandet ta thek.
Ingsu ason thak thak thengpi, kaipho lapen chek akangchim achet eri-ekeng patekung chok , tum chok, ingsu ason bihek hek hedet, ingsu pen kesung-ih  nang ason thot si lahai penta kai arjon sung i nangkok thek. Lasi ingsu lapen ajat angtak akangchim achet ebang arjon ivur-ipum  aling sita chehek mate chephi dunphit nangji. Anlote e ok epran mesenji.
Thengpi ” Birhu lapen  Chiri” kache pa-ok
Birhu thengpi angkep along arong vangpo. Thengpi alang ingsip si chingjok, khai po. Lason si thengpi arotin along Birhu arong bon krei jangkrai pen aphi thengpi aro kreng et , lok-et, pen aphi arongpi ta thilot, thuvok pen krep-phit po chiri ta lasonsi thengpi angkep along arong vang chingjok, angkur chesak pen pejo pejo aro-arim chelo po angkur ta thengpi arong aphan perthip pen thengpi thilot, thuvok, krep phit po.
Pe ahem arlo ahemphu lapen ka-ut.
Arnisi ka-ut amoi athak ardon si ingnam ajo damlo. Dambom ahut arve jangdut lo. Ahemphu abang pe ahem cheselam si arlo dojoi arve chetebin lo. Arve charsi un eh  si ka-ut ta ahemphu aphan  neta nanglut dun lang pura hokum
chohang si aphu an lut dun lo. Aphi pejo pen achethok an lut dun si aphisi ke abang arjon lut dun amat ahemphu abang angtan dam nangkok lapen peh ahem ta pakrep-phit lo.
E ok pen bang a ok, thengpi pen birhu, lapen ka-ut pen ahemphu . La sonthom alamthe Sixth schedule area arlo kedo karbi akhei atum munthi peme, chini peme nanngji, kopi aphan, kopi alamthe, kopi alam acho si kaperap dam.
Kenangsot nai alamthe ke lahelo, Kt. Semson Sing Ingti pen danglok – Kt. Khorsing Terang , Kt. Biren Teron (Kt.Chotro sing a ik),  Kt. Song bey, Kt. Moniram langneh, Kt. Sarsing Teron, (Habe) Kt. John Kathar, Kt. Basa ingti Kathar, Kt. David Long Enghee, Kt. Philip Millik atum cherap cheto si 1951 aningkan Mikir and N.C  Hills Autonomous Dictrict Council pu District palong si senglo. District ajakong aron alo (constitution) autonomous chari-chalom  (Power & function) aron alo selam lo. Selam lo sita Karbi atum English thek peme abang kave det ajok inglong aso mate karbi kali det thoi aso atum pensi mikir Hills Autonomous District Council Chari-chalom aron sixth schedule ateng pen selam si kirla etlo.  Sixth schedule ajakonmg pangdei hek amat si KAAC ke Jakong Chechak thekthe detlo.
Song ingkoi ra phli chelangsi Council election aphan electoral role, Council methang si voter list cheselam long nangji pu chesong si H.Court along PIL case pilo.  Court keraitang ateng pen non KAAC pen structuring / drafting committee seng lo. KAAC atum song 24 atum aphan ke enut bak aphan ta amen thap ponpe si H. Court along kam klem bom Sar Chetia lapen Sar Mishra aphan kaparlo ponke methang a ok along bang a ok kapo ok pon ason lo. High court pen bang hini aphan kaparlo pon ahukum alo dokok sita KAAC pen kroi kredet si kenangpo.
Thoi aso thek reset atum koson si adim angkrak long dun ra karbi atum aphan abidi pabob ra alangtum  akhei aphan asongtin ta asai nangkelong dun thek poma la aphan si bidi kanglim pen keklem.
District kelong ahut ke thek reset abang ave pulo, la-apotsi bang nang chejok dun long lo, bonta non ke Karbi atum thek reset atum si ke ong lo. B.A, M.A. pen danglok, Doctor Engineer, Ph. D. Lapen ACS, IPS, IAS lapen technology ahin ta thek abang do-o  apor ahut bang akhei (thoi – aso) aphan phere-varet, inghon varet.
Structuring/ Drafting Committee along karbi kethek-reset pi aling kali, Sixth schedule aron kachematha, kachini kangtungte abang aphan ke lapen khei havar, inglong-arlok, langroi-langjeng, hidi-kume lapen longle-phelang kachinghon aning kave, ( Areng kelok alam kepu, Home-home, sweet sweet home, there is no place like home). Dim-klong kachinghon he atum aphan ke hang pon, ri-pon pedet si keme. Non KAAC pen keseng structuring/drafting committee along methang akhei bang kethom do, sita alanglitum amen pangdak de. Alanglitum khei amoi arbung atum kali.
Sar Harlongbi Ingti Kathar, Sar Tenjng Ingti, Sarkam chokam amo, retired tang atum ason son structuring /drafting committee along  ri pon, hang pon nodak ma?
Hight court  pen banghini aphan kaparlo pon ke e ok pen bang a ok , thengpi pen birhu, chiri lapen ahemphu pen Ka-ut alamthe ason mandet thek. Munthi matha parsik pen klem si khei aphan ale doji.
Sarlamthe do, ” Kelongtang avo avengkong ingdi pet nangji, kehortang  a-an dipde det nangji” ajat asai pen le vo long sitame avekong ingdipet nangji athema vo abang  chereng thu-et pulote ingjar ji. Vo long nak ji. Kehor tang a an dip nangne, chop hit nangji. An cho pader lote miso, bitu, aduk,-apret bondet ji lapen ingsam det ji. Ok sita an sita apor kepadam ke e ok – pran aphan me o e det ji.
High court pen sixth schedule ajakong ateng pen KAAC aphan council MAC Election aphan methang separate Voter list kaselamji ajakong longlo. Jakong longlok aphita sita karpu chophi thekthe a osomar asonsi longlok ta ok cholongle lapen an hor et ta an chothekthe-structuring/drafting Committee keseng ta matha parsikse te cheseng nak , ale ave det po.
” ale kave mathathe,
Ale kave akam klem kle
Ale kave apor padam de”

Leave a Reply

Your email address will not be published. Required fields are marked *

BREAKING NEWS
August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives