ADVERTISEMENT

This area is available for advertisement. Please contact for details.

Arnivang
Get Adobe Flash player

MoS alamdon ateng kapapleng chun pame lote KAAC alar KAATC pusi chetok po: Horen Sing Bey

Diphu, Paipai 23: Karbi Anglong atok-ano along kacheleng atovar pen chenglok kaprek-kaprek jutang anat kapachingthurji aphan pura kedamtang 2011 aningkan United Peoples Democratic Solidarity (UPDS) lapen Central sorkar angbong MoS alamdon chetok lo. Halaso ahut MoS mate Karbi Anglong Territorial Council alongsi sika 3.50 crore package nangpale po pusi lamdon along panong lo. Laso atengsi atok-ano kachingthur asai amo kedo an kedengji aphan pura pu-pu angbong chedon lo. MoS alamdon ateng pulote bangso a package ke ningkan 5 (Pho) angbongsi keklem patang-et nangji pusi aron aloh along pangdak lo.
Sika 3.50 crore package angbong pen Joyram Ingleng KAAC CEM arpu kedeng bom ahut sika 34 crore atangka nanglesi West Karbi Anglong along kaprek-kaprek adim atovar selam longlo. Sonsi non puthot sika 44 crore atangka central ratpangri pen tangka nangpale tanglo lapen bangso atangka pen Taralangso first gate 5 mile pen  Disama-Havarkimi adak mesen PWD atovar selam po pusi UPDS atum MoS alamdon along kachetok dunvek abangphu KAAC a MAC Horen Sing Bey pherangke karju ahut thak dun.
Lasi package ateng pen kelong nangji atangka anta central ratpangri pen tangka nangkelole rek ajoinesi pachun un-eh reklo. Setame non KAAC abitung pen prapjin pen nangkapaleji aphan central ratpangri pen chingki bom lo lapen nangkeloji kedo lang atangka anta apor ateng nangpale po pu nangchechak dunlo puta KAAC MAC Horen Sing Bey than.
MoS ateng pachun pame lo pulote Karbi Anglong Autonomous Council (KAAC) alar Karbi Anglong Autonomous Territorial Council (KAATC) ke lar nangpo, seta central ratpangri pen sixth schedule kedo an kaparlo anke kapangtui (upgrade) ji aphan klem rap pet po pulo. Seta Khasi Autonomous Council along Meghalaya ratpangri atum atum pen state ratpangri alongsi arpu pi-et nangji pu kekhangthip ajoine pensi pachun-un-eh rek lo. Non an Khasi Autonomous Council pen Meghalaya ratpangri angbong kacheton angthek nangklangsi central ratpangri prapjin pen sixth schedule kaparlo autonomous council do anta ajakong pangtui rappet po puta KAAC MAC Horen Sing Bey jai.
Pinpurme, MoS package along kedo sika crore 350 atangka ke ningkan isi along sika crore 70 kachingthur asai dengsi ningkan pho angbong bangso atangka pa-ik nangji. Setame UPDS atum MoS alamdon chetokdet pen ningkan 7 aphi non an sika crore 33 vetlang nangkele lapen puthot sika crore 44 atangka nangle thu po. Jongsi MoS ka implement asai chun pame pulote Karbi Anglong Autonomous Council (KAAC) pu adim Karbi Anglong Territorial Council pusi pangni po. Jongme jongsi apor ateng pen bangso a package atangka pa-ik dun thekthe pulote bangso atangka cheruijui je detji ma pusi penang an thek reset arat atum pen chethan rinti.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives