ADVERTISEMENT

This area is available for advertisement. Please contact for details.

Arnivang
Get Adobe Flash player

Mobile phone pen ning kachedok ale inut abangphu jail kachethap nang

DIPHU, Paipai 23: Ningje thekte lam ningje thekthe te pham pu sar palamthe asonsi mobile phone ta ot thek pulote mepik jongsi o thekthe pulote kisung pu asonsi Kheroni along labangso a mobile phone ke-ot thekthe det ajoine inut abangphi akai kanahok nang lapen inut abangphu jail kachethap nang. Birta kelong dun atengke Kheroni police station kaparlo Mailu atalom inut arta kijum animsopi mobile phone along pangthek thekthe a number pen inut arisomar pen chepachini lo. Halabangso arisomar abang Langka Punjub basti Rahul Biswas pusi chepachini dun lo. Alanglitum angbong chiklo ejon sose phone pen chingki bomsi aphike aning chehang detlo. Setame kedamtang Jakhong achiklo niphai 22 arni Rahul Biswas pu kachepachini arisomar abang laso animsopi aphan chokat ponlin rapjuilo lapen ni trok an kacholangrem chenek det aphi Jakhong 28 arni puthot Mailu ahavar elong adim halabangso animsopi aphan vartekang phitsi katjuilo. La anchot ta kali halabangso ot langno arisomar kachomatha laso animsopi aphan mek chelangnodak amohor ensi social media along kapachethak asaita klem pusi akoi van. Kisung kephovek animsopi ahem asor atum laso alamki aphuthak lamhoi kipi ajoine Mailu Out Post police atum adai kedovek halabangso arisomar aphan nep ingnangsi jail thaplo pusi chini dun. Police atum nepdet aphisi halabangso abangphu Rahul Biswas kali inut Muslim akhei arisomar pusi klardak alam longlo. Laso alamki aphuthak kheroni-Mailu atalom along ongdung abangphu bangphi atum ning kangsamse chepaklangsi adai kedovek Hindu pu kachekrong abangphu aphan sodak ingsai nangji pusi hang.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives