ADVERTISEMENT

This area is available for advertisement. Please contact for details.

Arnivang
Get Adobe Flash player

Tezpur along ingdeng 11 Karbi loh charli osomar fresher’s meet kibi

imageTezpur, Paipai 22: Inglong alongri Karbi Anglong pen West Karbi Anglong penang an Karbi loh charli osomar atum akangtui angdeng kacharli dunji aphan pura state adangpi kaprek-kaprek a district along loh charli dun bomlo. Inglong alongri pen sundamsi thoi ahavar kedo charli abangphu-bangphi atum pen ning isivet akengkam chejorsi akangtui angdeng charli dunbomlo. Komane atumke inut kemesen doctor, engineer lapen komane atumke thanbang lapen komane atumke inut mesen kapathu abang kachemanji aphan ning arlo chithit het pen aningkanvang ta thoi ahavar  Karbi osomar atum loh charli dun bomlo. Lasonsi rongsopi malom kacharli dunbom Karbi loh charli osomar atum methang-methang akemang kapachunji aphan isi akerap kelongji aphan 2018 aningkan Tezpur Karbi Students Association senglo. Tezpur along loh kecharlibom ariso-nimso atum aphan kapangrum lapen kaprek-kaprek apor ahut kisung-keboi along song pen cherap-cheto dun bomlo anparta Tezpur along aningkanvang akimi Karbi loh charli abangphu-bangphi atum aphan dengbomlo. Lason thak thaksi piningkan ta Tezpur Karbi Students Association patirpisi ingdeng 11 Tezpur loh kacharli dunmi abangphu-bangphi atum aphan kedeng mate fresher’s meet kibi. Laso ahut Tezpur Karbi Students Association pen lun parjusi sai angdeng pangcheng. Loh charli abarim bangphu-bangphi atum akimi charlidun abangphu-bangphi atum aphan dengsi ason-ason ning cheparong lapen Karbi akhei ajutang ongdung kekan-kilun paklang. Fresher’s meet kibi along West Karbi Anglong district BJP ameiphu Arun Terang alohi sarpo aman pen chetong dunsi akimi-aban charli bangphu-bangphi atum do-an chingrum petsi ning isivet pen methang kemang ason kachepachunji aphan bor-i nangpo athe laso pen ajoksi methang dim kapaphihup ahin pusetame kapaprang ahin akerap dopo pusi ningje. Lason thaksi WKAD BJP chunbang Rodip Ronghang, pheranke Apurba Kumar Nath lapen Jason Inghi atumta chetong dunsi kacharli ahin ardi chipira methang arpu cheklem pameka pen kemang ason chepachun nangpo pusi pinkhat. Mai along Nagaon, Jorhat, Golaghat, Dibrugarh Karbi Students Association jabang atum lapen Mising, Bodo, Nepali akhei loh charli asong jabang atumta chetong dun.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives