ADVERTISEMENT

This area is available for advertisement. Please contact for details.

Arnivang
Get Adobe Flash player

Kechengsi Den Arong Karbi hirbang amei, karju-kethak chepate

Langsoliet, Paipai 22: Paipai 21 Durmi arni Den Arong Higher Secondary School along Karbi Lammet Amei (KLA) Den Arong aro pen kechengsi Den Arong hirjir lapen karju-kethak chepate asai deng lo.
Jaimek ateng adap porphai 9 apor bangphu-phi atum amen kachethap, Laso aphi porphai 10 apor KLA Den Arong aro ameiphu Dhensing Ingti chepahemphusi hirjir kachepate ajaimek deng lo. Laso ajaimek Karbi Lammet Amei tiripi  sankur chunbang Kamsing Hanse aphan pangpu lo. Non kithurmi Karbi ovekimi atum Karbi alam pen loh tok oh nangjilang lapen kedotang alopharchap heihui kenam lapen kaporhi chehung nangji lang. Karbi akhei nang keplang pen chenglok porom-puthi, aron-atang, adam asar, kertang aron lahei alohpharchap ketok atum do lo. Lammet kuru Bonglong Terang, Kt Longkam Teron, Rongbong Terang, Lunse Timung, Bidor Sing Kro, Chondro Sing Kro lapen kaprek alammet po lammetpi atumta loh pharchap tok  lo.  La heihui akitap porhi lote Karbi aphurkimo aphuthakta chini longpo puta mai along sankur chunbang Kamsing Hanse jai.
Hirjir chepate chengche aprang Jambili Literary Foundation (JLF) pen Biren Hanse, On Teron, Longbir Terang, Hirjir Ingti Katharpi lapen Welsing Hanse atum pen hirjir hir lo.
Kado kave bang phokep sose hirbang atum chepate dun. JLF a chunbang On Teron, lunsepo Pansing Kro, lapen hirbang Khorsing Ingti atum pen hirjir kihir kachepate along ingsai dun lo.
Hirjir kachepte along kechengsi anong-e Boloram Rongpi, hini anong-eh Anjali Timungpi, kethom anong-eh Subhas Killing lapen Sumbi Teronpi, Sukursing Ingti lapen Milina Millikpi atum aphan ning parung anong-eh pajir lo.
Karju patar along kechengsi anong anong-eh Mount Sinai English High School, hini anong-eh Chinthong Ronghang English High School lapen kethom anong-eh Dengaon Higher Secoundary School atumsi chepalong lo. Bangso amai along  KLA ameiphu Suren Kramsa alohi sarpo aman pen chetong dun. Lammetpo Jorsing Bey, lapen Dengaon Higher Secondary School athanbang atum anparta kaprek-kaprek man kedo abangphu-phi atum chetong dun.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives