ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 2 KSYA mahang kethek arni katalon

Diphu, Paipai 21: Pini Karbi Anglong ahempi along kedo Diphu Club along Karbi Students & Youth Assembly(KSYA) atum ingdeng hini mahang kethek arni katalon.
Jaimek ateng adap apor KSYA ameiphu Sandar Teron pen song alama pachipur lo, laso aphi Sanjay Sing Bey jalinsi karlitang atum aphan chikimo.
Aphijong KSYA ameiphu Sandar Teron mai chepahemphu mahang kethek katalon rat amai ingni. Mai along sankur chunbang Longbir Timung pen mai kepha alamthe kejai lapen alohi kapachini apor en. Mai along alohi sarpo aman KCS ameiphu Chandra Sing Kro, man peng alohi aman pen Dr. Lipson Rongpi pen Advocate Sarthe Ronghi chetong dun, prekjek alohi aman pen DPCKA ameiphu Kiri Ronghang, sankur chunbang Danielson Bey, UKSA ameiphu Ratan Terang, KFA ameiphu Rajesh Tisso, DGCSUS sankur chunbang pen Magazine a chunbang chetong dun.
Mai along kachetong dun DPCKA chunbang Danielson Bey pen khei angbong ning isi kedoji lapen lahin lahin angbong man kachipi seroi akenangsot alam jai. DPCKA ameiphu Kiri Ronghang pen ove kimi atum loh kacharli kachepaduk nangji pen chenglok khei longri kacheraikom nangji anparta Karbi Anglong ahoi kacheraikom nangji alam heihui mai along jai tekang.
KFA ameiphu Rajesh Tisso penta Karbi aosomar atum loh kacharli ahin kapaprang dunji aphan piso ke-en penan kedo pader nangji pusi jai tekang. UKSA ameiphu Ratan Terang pen sixth schedule kachesong kapachun nangji alam pen pangchengsi khei longri kacheraikom nangji alam heihui mai jai tekang.
Advocate Sarthe Ronghi pen Karbi aosomar atum loh kacharli ahin kapaprang dun nangji alam pen pangchengsi customary anparta kaprek kaprek aron kachini nangji akenang aphuthak mai along jai tekang. 
Dr. Lipson Rongpi pen Karbi alam kapangcho nangji lapen Karbi atum amethang alam kachirim pameme det ajoine kivir rang-rang alam kemang aphuthak jai. Laso ahut alangli kejai ke Karbi a sarpimar han kejor atumta Karbi alam kapavir isi lo, non apor Karbi atum jasemetpet ove kimi atum bang alam en-eh pin Karbi alam kaningje pachoklim thekthe puta alangli jai.
Alohi sarpo KCS ameiphu Chandra Sing Kro pen Jutang aphuthak jai, laso ahut alangli pen Karbi atum English mate kaprek akhei alamthe kirim dun kanglumpik aphuthak ta jai. La-an chot kali Karbi akhei atum ning isi kedo nangji alamta alangli mai along jai tekang.
Mai pachekak ke aprang KSYA sankur chunbang Longbir Timung pen mai along kachetong kado kave atum aphan kachoro pajir. Laso aphi pini amai kachari KSYA ameiphu Sandar Teron pen maiphu alamthe jaisi mai pachekak lo.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives