ADVERTISEMENT

This area is available for advertisement. Please contact for details.

Arnivang
Get Adobe Flash player

Dhonsing Rongpi si Asian Pacific Master Game along India a Athletic aphan jalinpo

imageDiphu, Paipai 21: Non kevangji Chiti achiklo niphai 7 pen 15 an Malaysia adet Penang along kapamanji Asian Pacific Master Game along India pen kachepate dun along Athletic team aphan Diphu Rukasen asor Dhonsing Rongpi jalin po.
Pini arnikangsam apor Thekar apherangke lapen KAT News Channel apherangke atum a Asian-Pacific Masters Game along kachepate dunji aphan India Athletic team a coach Dhonsing Rongpi aphan ahem along chetong dam si archo dam.
Laso ahut alangli kethan atengke, Asian Pacific Master Game along India pen kado kave bang 156 atum chepate dunji laso angbong bang 145 ke pathu bangphu-phi lapen bang 11 ke official. Bang 11 official angbong pen Dhonsing Rongpi ta inut lo. Laso along Assam pen kado kave bang 15 abangphu-phi atumta Malaysia Penang along chepate dunpo, laso angbong pen bang 13 Karbi Anglong a pathu bangphu-phi atumta India apharman Malaysia Penang along kibiji Master Game along chepate dunpo puta alangli than.
Pinpurme, kedamtang Chandigarh along kapaman National Master Game kapathu ahut alanglisi Assam a team aphan jalinlo. Laso ahut Assam pen kado kave bang 52 kapathu bangphu-phi atum chepate dun. Laso ahutta ongdung Karbi Anglong abarim pathu bangphu-phi atum aphan National angdeng along kachepate dun longji aphan alangli avarsai pipon lo. Assam apharman Football kapathu along kado kave bang 16 ta Karbi Anglong pathu bangphu atumsi pathu dun lo.
Punjap, Chandigarh along National Master Game kapathu ahut nong-eh kelong dun lapen halaso ahut kangvai ateng kado kave bang 13 atum non Chiti 7 pen 15 an Penang along Asian Pacific Master Game chepate dun long po.
Dhonsing Rongpi kapachini ateng ke, Malaysia along kapamanji Master Game along kachepate dunji aphan kevangji Chiti 5 arni India pen barpo, laso aphan All Assam Master Game ameiphu CEM Tuliram Ronghang, Working President Ritesh Inghi atum pen chingki chethansi barbe aprang pherangke amai pangniji puta alangli than.
Pinpurme, alangli kapathu ahin aning kehangpik ajoine loh charli bom Class IX ahut state angdeng kapathu bangphu man lo.  Alangli kapathu anat kihungpik ajoine inter school kapathu pen chenglok kaprek kaprek angdeng kapathu along ongdung nong-eh chepalong dun.
Alangli arta do-oh ahut anke kapathule un-eh seta kapathu akrong ke kache-oh eh det ajoine 1996 aningkan Assam Athletic Association along rap chunbang chepaman dun lo. Laso aphi 2000 aningkan pen non an alangli Assam Athletic Association along joint secretary arpusi deng bom lo. La-an chot kali Assam Olympic Association alongta 2000 aningkan pen non an do dun bom lo.
Laso aphi 2017 aningkan pen alangliphan National Master Game alongta Convenor pek lo. Lapuson alangli eson pen eson along cherap dunsi angsong angdeng arlo dun bomsi non an alangli India Athletic atum aphan International angdeng kachepate along inut kejapon abangphu chepaman lo.
‘Ove kimi atum kapathu kethekji aphan kaike lakle det nangji, pathu tame ajat asai tame jongsi otthip pulote akemang chun vekji’ pusi Dhonsing Rongpi ningje.
Alangli angsong angdeng along kedo dun kok ajoine International angdeng kachepate along ephong bang 13 atum kidun longji ke Karbi Anglong arat aphan isi kemesen abirta lo. Kedamtang Punjab, Chandigarh along National Master Game kachepate alongta ke-ongdung Karbi Anglong a pathu bangphu-phi atum varsai keme long dun lo. Alangli kapathu ahin Karbi Anglong aphan kangthur asai keklem along Karbi Anglong Autonomous Council a CEM Tuliram Ronghang kacherap dun alamta pini pherangke atum pen kachingki ahut chethan. Kedamtang National Master Game kapathu ahut CEM Tuliram Ronghang kapajir dun akerap pensi kenangji ahormu heihui nampi longlo puta alangli pherangke atum athengno than.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives