ADVERTISEMENT

This area is available for advertisement. Please contact for details.

Arnivang
Get Adobe Flash player

Meghalaya pen kipi voter ID pen chenglok kaprek-kaprek ason kachevoiji aphan kacherai

KSA pen SGB atum ahoi aphuthak cheroktok amai kangni

Hamren, Paipai 20: West Karbi Anglong Meghalaya ahoi kedo Karbi akhei angbong ning isipet kedo thekji aphan pusi atumi Paipai 19 arni Laru Centre pathu aklam ahoi aphuthak kacherok amai kangni.
KSA Laru Head Branch pen sarkari goanbura (SGB) chelangpet kapatirpi pen kapangni amai along ahoi kacheraikom dunji aphuthak kachingvai ardipi.
KSA Laru Head Branch ameiphu Khorsing Rongpi kachepahemphu amai along Laru, Rongthe-ang, Murap, Ok-lokpi, Langhonjar, Mowsladiang, Umru, Umlapher, West Umlapher arong asarthe atum chenglok havar arat ongdung chetong dun. Mai along ahoi aphuthak penang an chingki-chingvai det aphi arsikjik pen son thom alamrai deng lo.
Laso ateng bang hini bang kethom chingvai vongvong pen kesengtang a VDP an pri thu-etsi rat chingvaisar pen akimi a VDP sengthu nangpo. Meghalaya pen kipi solar a scheme pen kechenglok ongdung bidi kanglim pen West Karbi Anglong arat aphan kapachodeng dun bor-i kether-kehap along kacherap dun a VDP atum aphan aning apun kephophe det ajok kelar thu-etji aphan cheparai.
La-an chot kali VDP arpu kimi kipi mate kangvai thuji, Upper Chinthong kedo arat Meghalaya pen kipi a ration card lapen Voter ID chingthansi Meghalaya aphan hodai thu nangpo, ningkan 60 sose Karbi Anglong district arlo dodet aphi non ningkan 7-8 angbong Meghalaya a document kaselam pi-ver abangphu aphan ritarlipsi aron kelang chari atum arideng hodai nangpo, 1950 aningkan Meghalaya pen Assam ahoi plak tangvet aphi non anta disputed area pu nang kehangver ke kroi nangne lo puta mai along cherai.
Bangso kachingvai amai along rat saiklembang Ghan Bahadur, rong asar Joysing Tokbi, Gonendra Newar, West Umlapher pen SGB Mon Bahadur Newpani, VDP ameiphu Shivo Khonel lapen Lower Chinthong pen Chondro Rongphar atum chetong dun. Kachingvai amai kapangni along rat aning klarsap pen kachingvai kacheparai aphuthak KAAC kachari penta ardi nangpi dun nangji. Karbi Anglong ahempi along kachingthur asai kedeng kachemitme det asonsi nelitum ahoi along kedo arat alongta nang chehumri pen kachingthur asai amo deng nangji pusi havar arat pen choningri.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives