ADVERTISEMENT

This area is available for advertisement. Please contact for details.

Arnivang
Get Adobe Flash player

Hemprek kehang ke ning isivet nangji: MP Biren Sing Ingti

imageDiphu, Paipai 19: Kedamtang arni hemprek aphuthak Karbi Anglong arlo kedo ratchari asong do-an atum mai kangni ahut kacherai atengsi aphong-aphong Delhi kedam ahut netum Karbi Anglong District Congress Committee pen cheto dun lo. Seta kamanghu meme alam ke halada Delhi lerok lote ratchari asong alam pathe rong titisi kethek long pusi KADCC ameiphu lapen MP Biren Sing Ingti pherangke atum pen kachingki ahut ningje.
Rajiv Gandhi PM kikhi bom ahut neli kado kave aphan ponpe seta Rajiv Gandhi athengno hemprek alam chingki dam lo. Laso ateng alangli ta kroi lo seta kopai kelangno asonsi man det, alangli pran kedamjui ajoine hemprek ta longle det lo. Rajiv Gandhi apran damde asonte non an ke ilitum hemprek long-et po puta MP Biren Sing Ingti than.
Hemprek kehang along ratchari alam pathethe det nangji. Non Karbi Anglong a BJP lapen a CEM, EM, MLA atum aphan isi apor keme lo. Athe Delhi, Dispur lapen Diphu anta BJP atumsi kachari jeng ron lo. La-an chot kali Rajnath Singh song ameiphu kekhi bom ahutsi Dokmoka kilik kapachethang amai along hemprek nangkipiji alam ningje tekang lo. Laso ateng alangli non ke home minister khi bom lo. Lasi alangliphan chetong damsi chingvai dam nangpo puta MP Biren Sing Ingti ningje.
Non ke party high command atum aphan chephere rong lapen anghoi che-oh nangkok na pu kaphere ajoine ingsamrisi kethek long puta alangli ningje.
Pherangke atum pen kachingki ahut Nagaland pen Karbi Anglong, Meghalaya pen Karbi Anglong ahoi aphuthak ta alangli pinpur. Karbi Anglong ahoi along Naga atum aphan kapado varet pen mo kevangji arni alanglitum aphan choplung unjima pusi alangli arju.
Non malom hamphang asong 24 kachesong electoral roll aphuthak ta alangli ningje. Laso ahut alangli kaningje ke, 1951 aprang pen kedo atum aphan vote kejok ajakong pinangji, seta Council kilik alamke Council si cheparai nangpo lapen ladak kedo khei barim lapen inglong aso atum aphansi vote kejok ajakong pi nangpo puta MP Biren Sing Ingti ningje.
Aprang kanghong ding MP kilik aphuthak alangli kaningje ke, madu aratchari aphan pahaiji lapen paremji seta rat aridengsi ajakong do. Non BJP atum Assam chari bom apot le haivekji lapu kali, rat jongsi aning dokde tang lote kachari bom atum tame rem nangkokji. La-an chot kali kachari along ave det puseta rat jongsi aning hang pulote pahai det un. Ningkan pli BJP atum det adang kachari hut rat atum BJP aphan ongdung aningkangsamse do lo. Laso ajoine kaprek-kaprek state along by-election along ta Congress aphansi rat ingvai pa-ong lo. Assam along Hindu Bangladeshi alam pen chenglok kaprek-kaprek alam pen rat aningkangsamse do lo. Lasi non kevangji MP kilik ahut Assam along BJP atum haihe puta MP Biren Sing Ingti pherangke atum pen kachingki ahut ningje.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives