ADVERTISEMENT

This area is available for advertisement. Please contact for details.

Arnivang
Get Adobe Flash player

Amri-Chinthong Hirjir kachepate amai

Diphu, Paipai 19: Atumi Paipai 18 arni Amri Constituency angkang Umswai ME school along Amri-Chinthong Hirjir kihir kachepate amai pangni.
Amri-Mirlong Hirbang Amei atum kapatirpi along Jambili Literary Foundation (JLF), Helping Hands Society (HHS) anparta Amri Chingthur Asong (ACA) cherap dunsi hirjir kihir kachepate ajaimek mesen pachun lo.
Havar kelangpik asonsi hirjir kihir kachepate amaita mesen pen chunsi kaphihup ahavar along isi phurkimo selam lo.
Arnisi apharman hirjir kihir kachepate amai along Karbi Lammet Amei a bidisar Dhansing Terang chetong dunsi ingpu lo. Mai along KAAC EM barim Surjya Rongphar pen chenglok kaprek kaprek kaprek anong kachethang klong hirbang atum chetong dun.
Hirjir kihir kachepate ahut KCS sankur chunbang Bidyasing Rongpi pensi chari lo, laso along hirjir kihir kachepate kangsai dunji aphan Sikari Tisso, Chitra Kr. Bey, Deben Timung, Longsing Kro chetong dun. Laso along havar kedo ongdung ove kimi hirbang atum chetong chepate dun. Hirjir kihir kachepate pajutje aprang Bidyasing Rongpi pen chenglok kaprek kaprek anong kachethang klong hirbang atum pen amethang kasonse ahirjir kihir chepaklang rinti lo.
Anerlo apor Amri-Mirlong Hirbang Amei ameiphu Longkiswar Phangcho chepahemphusi Hirjir aphuthak chethan-chemum amai pangni. Mai along anong kachethang tokbang lapen abarim pherangke Joysing Tokbi, tokbang Hangmiji Hanse, anong kachethang klong folklorist Longsing Bey lapen Kabya Kamal award kedeng ahirbang Sar-et Hanse  atum chetong dunsi mai along Karbi ahirjir aphuthak penang an lam than tekang lo. Laso ahut kosonsi hirjir ketok nangji lapen hirjir pen ajok Karbi literature kosonsi kapangcho nangji alam heihui than tekang.
Hirjir kihir kachepate along Murap asor Kajir Rongpipi kechengsi anong-eh chepalong, Chinthong Khangmasi asor Samsing Hanse adunthu anong-eh, Deopani asor Ramsing Terang kethom angdeng anong-eh chepalong lapen bang trok Serlima Hansepi, Samson Ingti, Roshmi Rongpipi, Kamala Beypi, Mina Ingtipi, Malin Rongpipi atum aphan ningkangsam anong-eh pajir lo.
Mai mesen pen kachepachun long apot mai kachepatirpi atum pen kado kave atum aphan kachoro pajir. La-an chot kali West Karbi Anglong pen Meghalaya ahoi kedai kedo ahavar atum aphan lapuson toklang ahin aprang kejalin ponthek apot mai katirpi atum aphan havar arat atum penta kachoro pajir.
Mai along kapachun along havar arat atum ning ingthir et pen mai kapatirpi atum aphan kerap kipi dun apot mai katirpi atum pen kachoro pajir tekang.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives