ADVERTISEMENT

This area is available for advertisement. Please contact for details.

Arnivang
Get Adobe Flash player

Ronghidi-Tharmitlangso-Phongjangre arat kedam atovar mesen ave lang

imageHAMREN, Paipai 17: Kedamtang Paipai 15 arni Hamren Rongsopi Rongbong Ronghang pathu aklam along India Independence katalon ahut Assam ratpangri lapen Karbi Anglong Autonomous Council atum pen ongdung kachingthur asai klem lo pusi alohi atum jai. Assam lapen Council atum pen kachingthur asai klem oh lo puseta No.8 Hamren MAC Constituency kaparlo Ronghidi-Tharmitlangso-Phongjangre ahavar arat atum pini arni anta mesen tovar, rihing ameh, mesen kijun alang long dunde lang. ASDC atum council kachari ahut ko-an ma kam keklem lason majok aratpangri atumle council nang cherai seta ahokpet rat aphan kelang kapangri ave pusi havar along kedo arleng kesar atum chethan.
Congress ratpangri atum ningkan-15 angbong tovar ahin nang kelang thangnat ta ave. Non BJP kachari ratpangri pen kopi klemjine pusi havar arat tovar cholang phrong lo.
Jengkha Deuri Tiniali pen Longle-ethan adak PMGSY pen atovar ajam kethe kehut ason prapjin pen Ronghidi-Tharmitlangso-Phongjangre adak atovar tame havar arat kacheleng kesung alam matha pen tovar nang kehutji aphan havar arat choningri.
Non vecheng veri apor ahut Public Work Department (PWD) Hamren Rongsopi along kedo Superintending Engineer (S.E) R&B, PWD (Road) Division lapen PWD Hamren Sub-Division ahin pen tovar kepan, longle kangrai, tovar kevak likbup likvor kacheleng kesung along tovar kasalok pruiji aphan KAAC kachari ajakong kedo atum pen sodak lamtoi pinangji.
Non amat tovar longle kangrai, tovar kevak thedung thedung anparta culvert kevak ajok rat atum penang kacheleng kisung chetong nang lo.
Kisung pen nang kapajokji aphan pusi BJP pen kachotoi dun abangphu EM barim mate  non MAC Mongalsing Timung aphan nelitum ador keso a vote pidunsi pehai lo. Seta alangli rat apharman thangta klemkle det asonsi thek long. Lasi rat akisung alam mathasi tovar kaselamji aphan rat atum choningri.
Lower Primary (LP) school hum-5  Amparchung, Tharmitlangso, Rongmongve, Phongjangre, Nongka-ah anparta Ronghidi ME school isi heihui along kacharli dun bom aosomar atum aphan lapen beha kachoklem atum aphan thedung kanahok do.
Loh thanbang atum adapvang Hamren pen  Ronghidi ahavar an nang kapele lapen loh nang kethan ingjinso meme lo puta havar arat chethan.

Leave a Reply

Your email address will not be published. Required fields are marked *

August 2018
M T W T F S S
« Jul   Sep »
 12345
6789101112
13141516171819
20212223242526
2728293031  
Archives